चुनाव रणनीतिकार प्रशांत किशोर आन राज्यमे बिहारक युवाक संग दुर्व्यवहार पर कटाक्ष कयलनि अछि। ओ कहैत छथि जे राजनेताक कारणे पूरा देशमे बिहारक बच्चा सभक अपमान भऽ रहल अछि।
प्रशांत किशोर कहलनि जे आइ पूरा देशमे बिहारक जनताक अपमान कएल जा रहल अछि। बिहारी व्यक्तिकेँ मूर्ख, अनपढ़ आ मजदूर मानल जाइत अछि। आइ बिहारी शब्द अपशब्द बनि गेल अछि। पूरा देशमे बिहारक बच्चाक संग जे अपमान कएल जा रहल अछि ओकरा लेल बिहारक नेता जिम्मेदार छथि।
प्रशांत किशोर बिहारक गौरवशाली इतिहासक उल्लेख करैत कहलनि जे बिहार ज्ञानक भूमि रहल अछि। दुनिया भरिसँ लोक शिक्षा आ ज्ञान प्राप्त करय लेल बिहार अबैत छलथि। बिहारक नालन्दा आ विक्रमशिला विश्वविद्यालय पूरा दुनियामे प्रसिद्ध छल।
ओ कहलनि जे बिहार ओ भूमि अछि जतय देवता लोकनि सेहो ज्ञान प्राप्त कयलनि। एकटा समय छल जखनि पूरा देश बिहारसँ शासित छल। मुदा, बिहारक नेता सभक ‘जंगलराज’ आ ‘ऑफिसर राज’क परिणाम ई भेल जे आइ बिहारक बच्चा आ युवा मात्र १० सँ १२ हजार रुपयामे पूरा देशमे जाए मजदूरी करय लेल मजबूर अछि। हुनका अपन घर आ परिवार छोड़ि आन राज्यमे मजदूरक रूपमे काज करय पड़ैत अछि आ एकर सङ्ग अपमान आ दुर्व्यवहार सेहो सहय पड़ैत अछि।
ओ कहलनि जे एहि व्यवस्थाकेँ बदलब जन सुराजक संकल्प अछि। बिहारक बच्चा सभकेँ नीक शिक्षा भेटबाक चाही जाहिसँ कियो हुनका अनपढ़ आ मूर्ख कहि अपमान नहिं करय।
प्रशांत किशोर २ अक्टूबरकेँ एकटा राजनीतिक दलक घोषणा करयवाला छथि। उल्लेखनीय अछि जे पश्चिम बंगालमे बिहारी छात्रक संग दुर्व्यवहारक एकटा वीडियो वायरल भेलाक बाद बिहारक राजनीति गर्म अछि।
