भारतीय अंतरिक्ष यात्री शुभांशु शुक्लाक धरती पर वापसी तय भऽ गेल अछि। केंद्रीय विज्ञान आ प्रौद्योगिकी मंत्री जितेंद्र सिंह काल्हि रविकेँ जनतब देलनि जे शुभांशु शुक्ला 15 जुलाईकेँ दुपहरिया 3 बजे (भारतीय समय अनुसार) पृथ्वी पर वापस लौटताह। ओ एक्सिओम-4 मिशन केर तहत तीन अन्य अंतरिक्ष यात्री सभक संग इंटरनेशनल स्पेस स्टेशन (ISS) गेल छलथि आ आब हुनक 14 दिनक अंतरिक्ष मिशन पूरा भऽ गेल अछि।
केंद्रीय मंत्री जितेंद्र सिंह सोशल मीडिया प्लेटफॉर्म ‘एक्स’ पर लिखलनि जे अंतरिक्ष यान केर ISS सँ अलग होबय केर प्रक्रिया (अनडॉकिंग) 14 जुलाईकेँ साँझ 4:30 बजे तय कयल गेल अछि। एकर बाद स्पेसएक्स ड्रैगन अंतरिक्ष यान 15 जुलाईकेँ दुपहर 3 बजेकेँ आसपास प्रशांत महासागरमे कैलिफोर्निया तट लग स्प्लैशडाउन करत। ओ इहो कहलनि जे समयमे लगभग एक घंटाक लचीलापन राखल गेल अछि आ कोनो बदलाब केर स्थितिमे सूचना समय पर साझा कयल जायत।
ओतहि नासा कहलक अछि जे मिशनकेँ हरियर झंडी देल जा चुकल अछि आ सभ आवश्यक वैज्ञानिक कार्य पूरा कयल जा चुकल अछि। एहि मिशनक नेतृत्व प्रसिद्ध अमेरिकी अंतरिक्ष यात्री कमांडर पेगी व्हिटसन कए रहल अछि, जखनिकि शुभांशु शुक्ला पायलटक भूमिकामे छथि। हुनक संग स्लावोस उजनान्स्की-विस्निव्स्की आ टिबोर कापू मिशन स्पेशलिस्टक रूपमे शामिल छथि। पाछुक दू हफ्तामे ई टीम अंतरिक्षमे कतेको महत्वपूर्ण वैज्ञानिक प्रयोग कएलक। एहिमे जैव-चिकित्सकीय शोध, रक्त नमूनासभक विश्लेषण, माइक्रोएल्गीक अध्ययन (जे भविष्यमें अंतरिक्षमे भोजन आ जीवन समर्थन प्रणालीक लेल उपयोगी भऽ सकैत अछि), आ नैनोमटेरियल्स पर शोध शामिल अछि, जाहिसँ पहिरय योग्य उपकरणक विकास संभव होयत जे अंतरिक्ष यात्री सभक स्वास्थ्यक निगरानी कऽ सकत।
नासाक अनुसार, टीम इलेक्ट्रिकल मसल स्टिमुलेशन, थर्मल कम्फर्ट सूटक सामग्रीक जांच आ अंतरिक्ष यात्री सभक व्यवहार पर आधारित अध्ययनकेँ अंतिम रूप देलनि अछि। आब रविकेँ अंतरिक्ष यात्री अपन प्रयोगक नमूनासभकेँ पैक करत आ स्पेसएक्स ड्रैगन यानमे सभ उपकरणसभकेँ धरती पर वापसीक लेल तैयार करत। शुभांशु शुक्लाक ई वापसी भारतक अंतरिक्ष मिशन आ वैश्विक सहयोगक दिशामे एकटा पैघ उपलब्धि मानल जा रहल अछि।
