साउथ ब्लॉक पहुँचल कतेको देशक राजदूत, विदेश मंत्रालय देलक पहलगाम हमलाक जानकारी

नई दिल्ली
*

जर्मनी, जापान, पोलैंड, ब्रिटेन आ रूस समेत कतेको देशक राजदूत विदेश मंत्रालयक साउथ ब्लॉक स्थित कार्यालय पहुँचला। सूत्रक अनुसार, विदेश मंत्रालयक अधिकारी सभ चुनिंदा देशक राजदूत सभकेँ पहलगाम हमलाक बारेमे जनतब देलनि।

विदेश मंत्रालय जी20 देशक चुनिंदा राजदूत सभकेँ पहलगाम आतंकवादी हमलाक बारेमे जानकारी देलनि, जाहिमे चीन आ कनाडा सेहो शामिल छल। ई बैठक करीब 30 मिनट धरि चलल।

एहिसँ पहिने बुधदिन रातिकेँ विदेश मंत्रालय पाकिस्तानक शीर्ष राजनयिक साद अहमदकेँ तलब कएलक। भारत सरकार सादकेँ औपचारिक ‘पर्सोना नॉन ग्राटा’ नोट सौंपलक। पर्सोना नॉन ग्राटा केर सीधा मतलब ई होइछ जे कोनो राजनयिक वा विदेशी व्यक्तिकेँ कोनो विशेष देशमे प्रवेश वा रहयसँ मना करब। भारत पाकिस्तानक सैन्य राजनयिककेँ लेल ई नोट थमौलक अछि। एकर बाद पाकिस्तानक लोककेँ एक हफ्ताक भीतर भारत छोड़य परत।

दक्षिण कश्मीरक पहलगाममे आतंकी हमलामे 28 निर्दोष पर्यटकक मौत भऽ गेल अछि। जकर एक दिन बाद बुधदिन सीसीएसक बैठकमे कतेको पैघ फैसला लेल गेल। प्रधानमंत्री नरेंद्र मोदीक अध्यक्षतामे ई आपात बैठक करीब ढाई घंटा तक चलल। बैठकमे केंद्रीय गृहमंत्री अमित शाह, रक्षा मंत्री राजनाथ सिंह आ विदेश मंत्री एस जयशंकर सहित आन वरिष्ठ मंत्री उपस्थित रहथि। एहि बैसारमे आतंकवादी हमलाकेँ गंभीरतासँ लेल गेल आ कतेको पैघ फैसला लेल गेल।

विदेश सचिव द्वारा बैठकमे लेल गेल निर्णय सभक जानकारी दैत कहलनि जे सीसीएस निर्णय लय चुकल अछी आ नई दिल्ली स्थित पाकिस्तानी उच्चायोगमे तैनात रक्षा, नौसेना आ वायु सेना सलाहकार सभकेँ पर्सोना नॉन ग्राटा (अवांछित) घोषित कएल गेल अछि। हुनका एक हफ्ताक भीतर भारत छोड़बाक आदेश देल गेल अछि। एकर संगे-संग इस्लामाबाद स्थित भारतीय उच्चायोगसँ भारत अपन सैन्य सलाहकार सभकेँ सेहो वापस बजायत।

सरकार अटारी चेक पोष्टकेँ बंद करबाक निर्णय कय लेने अछि। जे लोक वैध दस्तावेज संग पहिनेसँ एही मार्गसँ भारतमें प्रवेश कय चुकल छथि, हुनका 1 मई 2025 तक ओहि मार्गसँ लौटबाक लेल कहल गेल अछि। भारत पाकिस्तान संग सिंधु जल संधि पर सेहो तत्काल प्रभावसँ रोक लगयबाक निर्णय लेलक अछि। भारत एहि बातक सेहो घोषणा कय चुकल अछि जे पाकिस्तानक नागरिक सभकेँ आब सार्क वीजा छूट योजनाक तहत भारत यात्राक अनुमति नहि देल जायत। पहिनेसँ जारी एहेन सभ वीजा आब अमान्य मानल जायत आ एहि वीजाकेँ तहत भारतमे उपस्थित सभ पाकिस्तानी नागरिककेँ 48 घंटाक भीतर देश छोड़य केर आदेश देल गेल अछि।