सिजौलक छह दिवसीय मूर्ति प्रतिष्ठापन तैयारीक रुप-रेखा तैयार : डाॅ संदीप झा

मधुबनी समदिया!! जिलाक अंधराठाढ़ी प्रखंड स्थित सिजौल गाममे श्री राम जानकी मंदिरक भव्य निर्माण कराओल गेल अछि। नवनिर्मित मंदिरक गर्भगृहमे आगामी २४ अप्रैलके वैदिक विधान केर अनुरूप श्री राम जानकी, राधा-कृष्ण, शिव परिवार, भक्त शिरोमणि बजरंगबली एवम् नन्दी महाराजक मूर्ति प्राण प्रतिष्ठापन विद्वत आचार्य सांगी निवासी राजेन्द्र झा द्वारा कराओल जायत। श्री राम जानकी मंदिर मूर्ति प्राण प्रतिष्ठापन समितिक संरक्षक डाॅ. संदीप झा द्वारा आयोजित प्रेस वार्तामे छह दिवसीय आयोजनक विस्तृत जानकारी देल गेल। सिजौल गाममे ऐतिहासिक आयोजनक उत्साह चरम पर अछि। सर्वत्र आयोजनक चर्चा सहजहिं देखल जा रहल अछि। प्रेसके संबोधित करैत डाॅ. झा जनतब देलनि जे पूर्वमे एहिठाम प्राचीन मंदिर जीर्ण-शीर्ण अवस्थामे विद्यमान छल। ग्रामीण समाज मंदिरक जीर्णोद्धार करेबाक इच्छुक छलाह। पं. नित्यानन्द झा मंदिर जीर्णोद्धारक संकल्प लेलनि। फलत: भव्य मंदिरक निर्माण भेल। डाॅ. झा कहलनि जे छह दिवसीय विविध धार्मिक अनुष्ठान एवम् सांस्कृतिक कार्यक्रमक उपरांत ग्रामीण समाज मंदिरक सर्वतोभावेन संचालनक कार्य सम्पादित करता। एहि अवसर पर आमंत्रण-पत्रक विमोचन कयल गेल। मंदिरक भव्य प्रबंधन हेतु श्री राम जानकी मंदिर प्राण प्रतिष्ठापन समितिक गठन कयल जा चुकल अछि। जेकर अध्यक्ष विवेकानन्द झा, सचिव दुखी यादव एवम् कोषाध्यक्ष जीवनाथ झा छथि। कार्यक्रमक विस्तृत जानकारी दैत विवेकानन्द झा बतौलनि जे छह दिवसीय कार्यक्रमक शुभारंभ २१ अप्रैलके भव्य कलश यात्रा द्वारा होयत। परिक्रमा एवम् महाप्रसाद दुपहर १२ बजे सँ प्रारम्भ होयत। २२ अप्रैलके नगर परिभ्रमण, अग्नि स्थापना, गंगाजलाधिवास आदि अनुष्ठित होयत। छवो दिन परिक्रमा एवम् महाप्रसादक प्रबंध कयल गेल अछि। सायंकाल पूज्य संत द्वारा प्रवचनक विलक्षण कार्यक्रम आयोजित होयत। २३ अप्रैलकें पूजन पुनरावृति, फलाधिवास, अन्नाधिवास, घृताधिवास आदिक संग २४ अप्रैल अर्थात् अष्टमी तिथिके मूर्ति स्थापना (प्राण प्रतिष्ठा), न्यास, हवन, परिक्रमा, पूर्णाहुति, पुष्पांजलि, विसर्जन एवम् महाप्रसाद दुपहर १२.०० बजे सँ २.०० बजे धरि होयत। रात्रिमे मैथिल सांस्कृतिक कार्यक्रमक आयोजन कयल जायत। एहि प्रकारें २५-२६ अप्रैलके संत प्रवचन समेत विविध धार्मिक एवम् सांस्कृतिक कार्यक्रमक विलक्षण आयोजन होयत। अनंत विभूषित गाद्याचार्य पीठाधीश्वर राधेश्याम शरणजी देवाचार्य एवम् महामंडलेश्वर किशोरी शरण देवाचार्यक मार्गनिर्देशनमे अनेकों वरेण्य संतजनक शुभागमन होमय जा रहल अछि। एकर अतिरिक्त विशिष्ट जनप्रतिनिधिगण समेत विपुल संख्यामे समाजसेवी महानुभावक सहभागिता सुनिश्चित अछि। प्रेसवार्ता केर माध्यमें मिथिलाक समस्त समाजकें एहेन भव्य मूर्ति प्राण प्रतिष्ठापन महोत्सवमे सबजाना आमंत्रणक संग हकार देल गेल। उक्त प्रेसवार्तामे डाॅ. डीएन. झा, शिव चन्द्र झा, जीवनाथ झा, सुधीर झा समेत विपुल संख्यामे अन्यान्य महानुभाव उपस्थित छलाह।