छत्रपति शिवाजी महाराजक ३९५म जयन्तीक अवसर पर बुधकेँ पुणेक शिवनेरी किलामे आयोजित कार्यक्रममे महाराष्ट्रक मुख्यमंत्री देवेन्द्र फडणवीस आ उपमुख्यमंत्री एकनाथ शिंदे आ अजित पवार भाग लेलनि। एहि अवसर पर मुख्यमंत्री फडणवीस शिवाजी महाराजक किलाक विकास आ अतिक्रमण हटयबाक संकल्प लेलनि। ओ कहलनि जे छत्रपति शिवाजी महाराज मात्र योद्धा नहि छलाह अपितु एकटा कुशल प्रशासक सेहो छलाह। प्रत्येक वर्ष हम सभ एतय अबैत छी आ एहि पवित्र स्थानसँ प्रेरणा लैत छी। ओ घोषणा कयलनि जे राज्य सरकार शिवाजी महाराजक सभटा किलाक विकास करत, आ अतिक्रमण हटाबय लेल एकटा विशेष कार्यदलक गठन कयल जायत।
एकनाथ शिंदे जनतब देलनि जे महाराष्ट्र सरकार शिवनेरी किला सहित १२ किलाकेँ यूनेस्कोक विश्व धरोहर सूचीमे शामिल करबाक लेल काज कऽ रहल अछि। ओ कहलनि जे जखनि-जखनि हम एतय अबैत छी तखनि-तखनि हमसभ एकटा अलग ऊर्जा आ प्रेरणा अनुभव करैत छी। हम शिवाजी महाराजक किलाक माटि लगा कऽ संकल्प लैत छी जे हम अपन अन्तिम साँस आ रक्तक अन्तिम बूंद धरि महाराष्ट्रक विकासक लेल काज करब। ओ इहो उल्लेख कयलनि जे छत्रपति शिवाजी महाराजक जयंती मात्र महाराष्ट्रमे नहि अपितु देश-विदेशमे मनाओल जाइत अछि।
उपमुख्यमंत्री अजित पवार शिवाजी महाराजक शासन व्यवस्थाकेँ प्रेरणादायक बतौलनि आ कहलनि जे प्रत्येक वर्ष लाखो लोक शिवनेरी किलामे श्रद्धांजलि दैत छथि। ओ कहलनि जे शिवाजी महाराजक सुशासन आ सामाजिक न्याय हमरा सभकेँ सही दिशामे काज करबाक प्रेरणा दैत अछि। सरकार ई सुनिश्चित करत जे हुनक किलाक विकासक लेल धनक कमी नहि होय।
छत्रपति शिवाजी महाराजक जन्म १९ फरवरी, १६३० केँ शिवनेरी किलामे भेल छल। ओ १७म शताब्दीक एकटा महान मराठा योद्धा छलाह जे १६७४मे मराठा साम्राज्यक नींव रखलनि आ मुगलक विरुद्ध कतेको युद्ध लड़लनि। ओ नहिं मात्र एकटा वीर सेनानायक छलाह बल्कि एकटा संगठित प्रशासनिक प्रणाली स्थापित करबामे सेहो सफल रहलाह। ओ एकटा व्यापक नागरिक संहिता लागू कयलनि जे जनताक हितक रक्षा करैत अछि।
