मारल गेल नक्सलीक संख्या बढ़ि सकैत अछि। बीजापुरमे सुरक्षा बल द्वारा कार्यवाही कयल गेल। समाचार सम्प्रेषण तक गंगूर थाना क्षेत्रमे मुठभेड़ भ रहल छल।
छत्तीसगढ़क बीजापुर जिलामे एक बेर फेर सुरक्षा बल आ नक्सलीक बीच मुठभेड़ भेल अछि। शनिदिन भोरसँ सुरक्षा बल आ नक्सलीक बीच मुठभेड़ समाचार सम्प्रेषण तक चलि रहल छल। एहि मुठभेड़मे कतेको नक्सली मारल जयबाक समाचार अछि। एखन धरि ८ नक्सली मारल जेबाक सूचना सामने आयल अछि।
बस्तर आईजी सुंदरराज पी. एनकाउंटरक पुष्टि कयने छथि। ओ कहलनि जे भोर लगभग ८:३० बजेसँ दुनू दिससँ रूकि-रूकि कऽ गोलीबारी भऽ रहल अछि। गंगूर थाना क्षेत्रक जंगलमे सुरक्षा बल आ नक्सलवादीक बीच मुठभेड़ भऽ रहल अछि। जानकारीक अनुसार पुलिसकेँ सूचना भेटल जे गंगूर क्षेत्रक जंगलमे पैघ संख्यामे नक्सली मौजूद अछि, जकर बाद सैनिकसभकेँ एकटा मिशन पर पठाओल गेल छल।
सूचनाक आधार पर बीजापुर डीआरजी, एसटीएफ, कोबरा २०२, आ सीआरपीएफ २२२ बटालियनक संयुक्त दल तलाशी अभियानक लेल पठाओल गेल। जहिना सुरक्षा बल एहि क्षेत्रमे पहुँचल, माओवादी गोलीबारी शुरू कऽ देलक। ओकर बाद सैनिक सभ सेहो अपन स्थान पर कब्जा कऽ लेलक। आईजी सुंदरराज पी कहलनि जे मुठभेड़ एखनो जारी अछि। तलाशी अभियान सेहो चलायल जा रहल अछि आ तलाशी अभियानक बाद सूचना देल जायत।
जानकारीक अनुसार सैनिक माओवादीक पैघ कैडरकेँ घेरि लेने छल। तलाशी अभियानक बाद ई पुष्टि होयत जे एहि मुठभेड़मे नक्सलवादीक कतेक क्षति भेल अछि।
छत्तीसगढ़मे नक्सल विरोधी अभियान जोर पकड़ि लेने अछि। छत्तीसगढ़क बस्तरमे पैघ संख्यामे नक्सली सुरक्षा बलक सोझाँ आत्मसमर्पण कऽ रहल अछि।
