पंचायत सचिवकेँ फोन पर जूता मारबाक धमकी देब मनेरक राजद विधायक लेल महग साबित भेल। पंचायत सचिव आ विधायकक वीडियो सोशल मीडिया पर वायरल भऽ गेल। आब विधायकक परेशानी बढ़ैत देखा रहल अछि। विधायकक बातसँ आहत भऽ पंचायत सचिव संदीप कुमार मनेरसँ राजद विधायक भाई वीरेंद्रक खिलाफ एसटी-एससी थानामे प्राथमिकी दर्ज करौलनि अछि।
पंचायत सचिव संदीप कुमार जखनि मनेरक राजद विधायकक खिलाफ मामिला दर्ज कयला केर बाद थानासँ बाहर निकललाह तँ ओ मीडियासँ सेहो बात कयलनि।मीडियाक एक-एक सवालक जवाब ओ बहुत बेबाक तरीकासँ देलनि। पंचायत सचिव कहलनि जे, विधायक भाई वीरेंद्र फोन पर धमकी देलनि अछि आ कहलनि जे, किछुओ भऽ सकैत अछि। जूतासँ मारबाक धमकी सेहो देने अछि। ई सबटा मोबाइलमे रिकॉर्ड भऽ गेल अछि। ओ ऑडियो वायरल भऽ रहल अछि। संदीप कुमार स्वयं मनेर प्रखंडमे तैनात छथि। आब ओ अपन जान लेल डरि गेल छथि, ताहि लेल अनुसूचित जाति आ अनुसूचित जनजाति थानामे विधायक भाई वीरेंद्रक खिलाफ प्राथमिकी दर्ज करौलनि अछि।
फेसबुक पर पोस्ट कय अपन स्पष्टीकरण देनिहार मनेरसँ राजद विधायक भाई वीरेंद्र एहि वायरल ऑडियो पर आक्रोश व्यक्त कयलनि अछि। ओ कहलनि जे हम निश्चित रूपसँ किछु कठोर शब्द कहने रही, मुदा पंचायत सचिव हमरा संग विनम्र व्यवहार नहि करलनि। भाई वीरेन्द्र लिखलनि जे हमर विधानसभा क्षेत्रक एकटा पंचायत सचिव द्वारा जानि-बुझि कय हमर एकटा रिकॉर्ड कएल गेल कॉल सोशल मीडिया आ व्हाट्सएप ग्रुप पर वायरल कयल जा रहल अछि। हम ओहि फोनमे किछु कठोर शब्दक प्रयोग जरूर कयने रही, जाहि पर हमरा अफसोस अछि, मुदा सबकेँ ईहो बुझबाक चाही जे जखनि हम हुनका फोन करलहुँ तँ ओ विनम्र व्यवहार नहि कयलनि आ नहि हमरा अभिवादन कयलनि आ नहि जनताक काजकेँ गंभीरतासँ लेलनि।
हम जनप्रतिनिधि छी आ जनताक मददि करय लेल सदिखन तैयार रहैत छी। जखनि कोनो पंचायत सचिव हमरा एहेन बेतुका आ लापरवाह भाषामे जवाब दैत अछि तँ कल्पना करू ओ आम लोक, गरीब आ जरूरतमंदक संग केहेन व्यवहार कय रहल होयत ? एकर संग-संग हम ई सेहो स्पष्ट करय चाहैत छियै कि कोनो सरकारी अधिकारी द्वारा एहि तरहेँ कॉल रिकॉर्ड कय ओकरा सार्वजनिक रूपसँ प्रसारित करब खाली आचरणक नियमकेँ उल्लंघन नहि छै, बल्कि गोपनीयताक अधिकार आ आईटी एक्टक तहत कानूनी रूपसँ दंडनीय अपराध सेहो अछि।
अपन बातकेँ एकतरफा प्रस्तुत करब आ पूरा संदर्भकेँ अनदेखी कय ऑडियोकेँ प्रसार करब अत्यंत निंदनीय अछि। हम अपन इलाकाक लोकसँ वादा करैत छी जे एहेन अधिकारीकेँ काज करय केर शैलीक जवाबदेह मानल जाएत। हम सदिखन जनताक आवाज रहलहुँ अछि आ रहब। जे हमरा एहेन रणनीतिसँ कमजोर बुझि रहल छथि, हुनका ई बुझबाक चाही, जनता सब किछु देखि रहल अछि आ अंतमे सत्य जीतत।
जनतब देब जे राजदक मनेर विधायक भाई वीरेन्द्र आ पंचायत सचिवक ऑडियो सोशल मीडिया पर वायरल भऽ रहल अछि। एहि वायरल ऑडियोमे दुनूक बीच भेल बातचीतमे भाई वीरेन्द्र पंचायत सचिवकेँ जूतासँ मारय केर धमकी दऽ रहल छथि। विधायक पंचायत सचिवकेँ फोन कय मृत्यु प्रमाण पत्रक सम्बन्धमे पुछलाह। मुदा पंचायत सचिव मनेर हुनका नहि चिन्ह सकलाह। फोन उठबैत ओ कहलनि, बाजू। भाई वीरेन्द्र एहि बात पर तमसा गेलाह। ओ कहय लगलाह जे तू हमरा नहि चिन्है छें। एहि दौरान विधायक आ पंचायत सचिवक बीच बहस शुरू भऽ गेल।
