रेलवेक एकटा वरिष्ठ अधिकारी रविदिन कहलनि जे ई घटना एकटा फुटओवर ब्रिजसँ नीचाँ अबैत काल किछु यात्री फिसलि गेलाह आ एक दोसर पर खसि पड़ला, जाहि कारणे एहन घटना भेल। एहन समयमे जखन भारतीय रेलवे महाकुम्भक लेल प्रयागराज जा रहल यात्रीसभक भारी भीड़क सामना कऽ रहल अछि, १५-२० मिनटक अन्तरालमे अचानक सैकड़ों यात्री प्लेटफार्म १३ आ १४ पर जमा भऽ गेलाह, जाहिसँ भगदड़ मचि गेल जाहिमे कतेको घायल भऽ गेलाह।
प्रधानमंत्री नरेन्द्र मोदी एहि त्रासदीपर शोक व्यक्त करैत एक्स पर एकटा पोस्टमे लिखलनि “हमर संवेदना ओहि सभ लोकक संग अछि जे अपन प्रियजनकेँ खो देलनि। हम प्रार्थना करैत छी जे घायलक शीघ्र स्वास्थ्य लाभ होय। अधिकारी एहि भगदड़सँ प्रभावित सभटा लोकक सहायता कऽ रहल छथि।’ एहि घटनासँ आन हाई-प्रोफाइल नेतालोकनिक शोक सेहो उमड़ि पड़ल।
रेल मंत्रालय एहि घटनाक उच्च स्तरीय जाञ्चक आदेश देलक अछि आ एहि मामिलाक जाँचक लेल दू सदस्यीय समितिक गठन कयल गेल अछि। स्टेशन पर यात्री द्वारा शूट कयल गेल वीडियोमे प्लेटफार्म पर भारी भीड़ देखाओल गेल अछि। दिल्लीक एल.जी.वी.के. सक्सेना एहि घटनापर आक्रोश व्यक्त करैत कहलनि जे ओ लगातार अभियानक निगरानी कऽ रहल छथि।
भारतीय रेलवे मृतक पीड़ितक परिवारकेँ १० लाख रुपया, गम्भीर रूपसँ घायल लोकसभकेँ २.५ लाख रुपया आ मामूली चोट लगनिहारकेँ १ लाख टाकाक क्षतिपूर्ति देबाक घोषणा कयलक। कांग्रेस केंद्रीय रेल मंत्री अश्विनी वैष्णवक इस्तीफेक मांग केलक अछि।
मध्य रेलवेमे मुख्य जनसम्पर्क अधिकारी हिमांशु शेखर शनिदिन साँझ नई दिल्ली रेलवे स्टेशन पर भगदड़ केना भेल, एकर विवरण साझा कयलनि। ओ कहलनि “मगध एक्सप्रेस प्लेटफार्म १४ पर ठाढ़ छल। प्रस्थानक बाद प्रयागराज एक्सप्रेस आबयवला छल। एकटा लोकप्रिय ट्रेन होयबाक कारणेँ पैघ संख्यामे यात्री प्लेटफार्म १४ पर जमा भेलाह। भीड़ देखैत प्लेटफार्म १२ सँ प्रस्थान करय बला एकटा विशेष ट्रेनक घोषणा कयल गेल। ओहि ट्रेनमे सीट सुरक्षित करबाक लेल प्लेटफार्म १४ सँ बहुत रास यात्री दौड़ि गेलाह, जाहि प्रक्रियामे अराजकता पसरि गेल।” ओ कहलनि जे एखन एकटा उच्च स्तरीय जाँच चलि रहल अछि आ निष्कर्ष जल्दीसँ जल्दी पूरा होयत। ओ आश्वासन देलनि जे तथ्य जनताक लेल उपलब्ध करायल जायत।
