बिहारमे १५ अक्टूबरसँ बालू खननक काज शुरू भऽ गेल अछि। राज्यक उप मुख्यमंत्री आ खान एवं भूविज्ञान विभागक मंत्री विजय कुमार सिन्हा हालहिमे एहि सम्बन्धमे अधिकारीसभक सङ्ग एकटा उच्चस्तरीय बैसार कयलनि। ओ अधिकारीसभकेँ अवैध बालु खननकेँ रोकबाक लेल ड्रोनक माध्यमसँ चौकसी रखबाक निर्देश देलनि। विजय सिन्हा कहलनि जे विभागक भीतर बहुत रास बदलाव होयत। हमरा सभकेँ हर हालमे अवैध खनन केर रोकय पड़त। ओ कहलनि जे राजस्व बढ़ेबाक प्रयास कयल जा रहल अछि। पछिला साल सितम्बर धरि बालु खननसँ ५७५ करोड़ टाकाक राजस्व प्राप्त भेल छल, जे एहि साल सितम्बरमे बढ़ि कऽ १०३४ करोड़ रूपया भऽ गेल अछि। एहि तरहेँ लगभग ८०% केर वृद्धि देखल जा रहल अछि।
मंत्री विजय सिन्हा कहलनि जे बिहार सरकारक पारदर्शिता, प्रशासनमे बैसल अधिकारी आ कर्मचारीक समर्पण आ अवैध खनन पर अंकुश लगेबाक कारण ई संभव भेल अछि। सब अधिकारीक तरफसँ लगातार सहयोग भेटि रहल अछि। १५ अक्टूबरसँ खनन कार्यमे पारदर्शिता सुनिश्चित करबाक लेल सभ घाट आ सभ जिला कार्यालयमे बैनर लगाओल जायत। बिहारमे ९८४ बालु घाट अछि, जाहिमे ५८१ पीयर आ ४०३ उज्जर बालु घाट अछि। एखन धरि ३७३ बालु घाटक नीलामी भेल अछि। एखनि ६११ घाटक नीलामी प्रक्रिया चलि रहल अछि। पहिनेसँ विद्यमान ५८० घाटमेसँ लगभग २५० बालु घाट छल, जकर पैघ आकारक कारणेँ नीलामी नहि कयल जा रहल छल।
विभाग स्तर पर समीक्षाक बाद एहि घाटसभकेँ कतेको छोट-छोट इकाइमे विभाजित कयल गेल अछि, जाहिसँ घाटक संख्या ४०० बढ़ि गेल अछि। एहि कारणेँ आब बालु घाटक संख्या ९८४ धरि पहुँचि गेल अछि। जानकारीक अनुसार २३७ घाटसँ खननक लेल पर्यावरणीय स्वीकृति सेहो प्राप्त भेल अछि। १५ जूनकेँ जखन मानसून शुरू भेल तखन बालु खनन बन्द कऽ देल गेल छल। ओहि समय १५२ घाटसँ बालु खनन कयल जा रहल छल। आब १५ अक्टूबरसँ बालु खनन पर रोक समाप्त भऽ गेल अछि। सरकारकेँ आशा अछि जे बालु खननसँ बेसी राजस्व उत्पन्न होयत। वित्तीय वर्ष २०२४-२५ मे खननसँ राजस्व अर्जित करबाक लक्ष्य ३६०० करोड़ टाका निर्धारित कयल गेल अछि।
