भाजपा सरकारमे ‘सबका साथ, सबका विकास’ आ जे बंगालके लूटलक, ओकर हिसाब होएत: पीएम मोदी
बीरभूम । समदिया
प्रधानमंत्री नरेंद्र मोदी बृहस्पतिकेँ चुनावी राज्य पश्चिम बंगालक बीरभूममे एकटा विशाल जनसभाकेँ संबोधित कएलनि। एहि दौरान ओ राज्यक तृणमूल कांग्रेस (टीएमसी) सरकार पर जोरदार हमला कएलनि। ओ बीरभूमक धरतीकेँ ऐतिहासिक, क्रांतिकारी आ प्रेरणादायक बतबैत कहलनि जे गुरुदेव रविंद्रनाथ टैगोर एहेन समाजक कल्पना केने छलाह, जतय सभ लोग भय मुक्त होए। मुदा टीएमसीक “महाजंगलराज” एहि सपनाकेँ उल्टा बना देलक अछि।
प्रधानमंत्री कहलनि, “टीएमसी ‘मां, माटी आ मानुष’क बात करैत अछि, मुदा आइ मां कानि रहल अछि, माटी पर घुसपैठियाक कब्जा भऽ रहल अछि आ मानुष डेरायल अछि।” ओ बीरभूमकेँ बोगतुई कांडक जिक्र करैत कहलनि जे ई केवल एक घटना नहि, बल्कि मानवता पर कलंक अछि, जतय निर्दोष महिला आ बच्चाकेँ जिंदा जरा देल गेल छल।
घुसपैठक मुद्दा उठबैत पीएम मोदी कहलनि जे टीएमसीकेँ सिंडिकेट घुसपैठियाक फर्जी कागज बनबा रहल अछि, जे देशक सुरक्षा लेल गंभीर खतरा अछि। “भाजपा सरकार बनिते घुसपैठिया आ हुनकर मददगार सभ पर विशेष जांच बैसायल जायत आ कड़ा कारवाई होएत,” ओ कहलनि।
राष्ट्रपति द्रौपदी मुर्मूक अपमानक आरोप लगबैत पीएम कहलनि जे टीएमसी सरकार अहंकारी अछि आ आदिवासी समाजक सम्मान नहि करैत अछि। “ई संविधान आ महिला सभक अपमान अछि,” ओ जोड़लनि।
महिला सुरक्षाक मुद्दा पर जोर दैत प्रधानमंत्री कहलनि जे राज्यमे बेटी सभक स्थिति चिंताजनक अछि। “ई चुनाव हमर बेटीसभक सुरक्षा लेल अछि,” ओ कहलनि आ भाजपा सरकार द्वारा महिला सभ लेल चलाओल जा रहल योजनाक चर्चा कएलनि।
युवा आ रोजगार पर बात करैत पीएम मोदी कहलनि जे बंगालक नौजवान रोजगार लेल बाहर जाए पर मजबूर छथि। “देशमे लाखों सरकारी नौकरी देल गेल अछि, मुदा बंगालमे नौकरीक नाम पर घोटाला भऽ रहल अछि,” ओ शिक्षक भर्ती घोटालाक जिक्र कएलनि।
ओ कहलनि जे टीएमसी राजमे लघु उद्योग बंद भऽ रहल अछि, मुदा “कच्चा बम”क उद्योग पसरि रहल अछि। “एहि स्थितिकेँ बदलनाई जरूरी अछि।”
प्रधानमंत्री कहलनि, “बंगालकेँ प्रकृति बहुत किछु देलक अछि। धरतीक नीचा प्राकृतिक संपदाक अपार भंडार अछि, मुदा टीएमसीकेँ सिंडिकेट एहिकेँ लूटि रहल अछि। आब चार मईक बाद टीएमसीक विदाई निश्चित अछि। बंगालमे भाजपा सरकार बनिते कनेक्टिविटीक नया अध्याय शुरू कएल जाएत, जाहिसँ युवासभकेँ नव रोजगारक अवसर भेटत।”
ओ आगू कहलनि, “केंद्र सरकार 75 हजार करोड़ रुपैयाक परियोजना तैयार क’ रखने अछि, मुदा टीएमसी ओहि सभकेँ रोकि देने अछि। आब सरकार बनिते एहि परियोजना सभ पर तेजीसँ काज शुरू होएत, जाहिसँ बीरभूममे छोट-बड़ हर तरहक उद्योग लेल नव रास्ता खुजत।”
मनरेगा पर निशाना साधैत ओ कहलनि, “टीएमसी गरीब परिवार सभकेँ मनरेगाक नाम पर ठकलक अछि। आब केंद्र सरकार जी-रामजी कानून आनलक अछि। जँ अहां सभ हमर सरकार बनायब, त’ ई कानून लागू कएल जाएत। गाममे 125 दिनक रोजगार भेटत आ मजदूरीक पूरा पैसा सीधे बैंक खातामे जमा होएत।”
किसान सभकेँ चर्चा करैत प्रधानमंत्री कहलनि, “टीएमसी सरकार आलू खेती केर बर्बाद क’ रहल अछि, जे बहुत गंभीर समस्या अछि। केंद्र सरकार छोट किसान सभ लेल एफपीओ योजना शुरू कएने अछि। बंगालमे सरकार बनिते नव एफपीओ बनाओल जाएत, जाहिसँ किसान सभक अनेक समस्या दूर होएत।”
अंतमे ओ कहलनि, “केंद्र सरकारक जे योजनामे ‘पीएम’ शब्द लागल अछि, ओकर लाभ टीएमसी बंगालक जनता तक पहुँचय नञि दैत अछि। सभ ‘सबका साथ, सबका विकास’क नारा सुनने छथि, मुदा बंगाल लेल अखैन बहुत काज करबाक जरूरत अछि। तेँ भाजपा सरकार बनिते ‘सबका साथ, सबका विकास’ संग जे बंगालके लूटलक अछि, ओकर पूरा हिसाब कएल जाएत।”
