मिथिलामे सदियो पुरान प्रसिद्ध कहावत अछि जे “पानिमे माछ आ नौ नौ कुटिया बखरा।” ई कहावत आइ-काल्हि शहरमे बस स्टैंड बनेबा लेल शत-प्रतिशत चरितार्थ भऽ रहल अछि। जमीन खोजबाक प्रक्रिया सालोंसँ चलि रहल अछि, जे एखनि धरि पूरा नहि भऽ सकल। एम्हर हाईटेक बस स्टैंडक चर्चा भs रहल अछि, हालमे शहरी विकास आ आवास विभागक मंत्री सेहो मधुबनी आबि हाईटेक बस स्टैंड बनेबाक गप कयलथि, मुदा स्थिति एहेन अछि जे एखनि धरि जमीन अधिग्रहणक प्रक्रिया सेहो पूरा नहि भs सकल अछि।
शहरमे आधुनिक बस स्टैंड बनेबाक योजना पर एक बेर फेर रोक लगा देल गेल अछि। जमीन केर अनुपलब्धताक कारण एहि महत्वपूर्ण परियोजना पर काज शुरू नहि भs रहल अछि, जखनिकि शहरी विकास आ आवास विभाग केर प्रशासनिक मंजूरीक संग पहिल चरणक लेल राशि आवंटित भs चुकल अछि, शहरी विकास आ आवास विभाग एकरा लेल 4 फरवरी 2025 केँ प्रशासनिक मंजूरी दs चुकल अछि। एहि लेल प्रशासनिक मंजूरीक संग ओही दिन 14 करोड़ 53 लाख टका आवंटित कयल गेल। करीब चारि मासक बादो जमीन नहि उपलब्ध हेबाक कारण एहि दिशामे कोनो पहल नहि भेल अछि।
निगमक अधिकारीक अनुसार शहरक रामपट्टी इलाकामे बस स्टैंडक निर्माणक लेल प्रस्तावित स्थल मत्स्य विभागक जमीन अछि, मुदा एखनि धरि संबंधित विभागसँ एनओसी नहि भेटल अछि।
रांटी, सौराठ आ पंडौल सड़क पर सरकारी वा निजी जमीनक अधिग्रहण वा लीज पर लेबाक प्रयास सेहो चलि रहल अछि। सूत्रक अनुसार जमीनक चयन कs ओकर प्रस्ताव विभाग केर पठा देल गेल अछि। एकर मंजूरी भेटलाक बाद निर्माण प्रक्रिया शुरू हेबाक संभावना अछि। जानकारीक अनुसार राजस्व विभागक टीम संभावित सरकारी भूखंडक पहिचान कs लेलक अछि। जँ एहि प्रक्रियामे सफलता नहि भेटल तs निजी जमीन लीज पर लेबाक सेहो प्रयास चलि रहल अछि। एहि मास जमीनक संबंधमे फैसला हेबाक उम्मीद अछि।
स्थानीय जनप्रतिनिधि आ व्यवसायिक संगठनक शिकायत अछि जे जमीनक उपलब्धता सुनिश्चित करबामे संबंधित विभागक सुस्ती सबसँ पैघ बाधा बनि रहल अछि। जँ जल्दिये कोनो ठोस फैसला नहि लेल गेल तs शहरकेँ सालों तक आधुनिक बस टर्मिनलक सुविधासँ वंचित रहय पड़त। हालहिमे रहिका अंचलक सिफारिश पर आ अंचलक सब अधिकारीक उपस्थितिमे स्टेशनक सामने सरकारी जमीन पर निशान लगा कs निगम द्वारा ऑटो स्टैंडक निर्माण शुरू कयल गेल छल। सब सामान स्थलसँ हटा देल गेल आ निर्माण शुरू भs गेल, मुदा करीब एक सप्ताह बाद जोन द्वारा काज बंद भs गेल। कहल गेल जे मामिला कोर्टमे लंबित अछि।
नगर आयुक्त अनिल कुमार चौधरी बस स्टैण्ड निर्माणक लेल जमीन चिन्हित करबाक प्रयास चलि रहल बतौलनि । उम्मीद अछि जे एहि संबंधमे जल्दिये निर्णय लेल जाएत आ शहरवासीकेँ आधुनिक बस स्टैंडक सुविधा भेट सकैत अछि।
