करोड़क डकैतीक कारण पूर्णियाक तनिष्क शोरूममे हलचल मचि गेल। पुलिस टीम सीसीटीवी केर जांच कए रहल अछि। तीनटा थानाक पुलिस घटनास्थल पर पहुँचि गेल अछि। पूर्णियाक एसपी आ डीआईजी स्वयं पूरा घटनाक निगरानी कऽ रहल छथि। सब थानाकेँ सतर्क कए देल गेल अछि। पूरा जिलाक नाकाबंदी कए देल गेल अछि। सभटा वाहनकेँ रोकल जा रहल अछि आ जांच कएल जा रहल अछि।
बिहारक मिथिला क्षेत्रक पूर्णियामे हथियारबंद शरारती तत्व दिनदेखाड़े तनिष्क शोरूममे करोड़ो रुपयाक भयानक डकैती कयलक अछि। ई घटनासँ पूरा जिलामे हड़कंप मचि गेल अछि। भारी पुलिस बल आ अधिकारी घटनास्थल पर पहुँचि गेल छथि। क्षेत्रकेँ सील कए जांच कएल जा रहल अछि। सीसीटीवी कैमराक सेहो जाँच कएल जा रहल अछि। लूटपाट करय लेल आयल शरारती तत्वक संख्या ६ कहल जा रहल अछि। उपद्रवी सभ पूरा योजना बना १५ मिनटमे पूरा घटनाक अंजाम दऽ भागि गेल।
शुक्रदिन दुपहरिया लगभग १२ बजे लाइन बाजारक तनिष्क शोरूममे छओ बदमाश करोड़ो रुपयाक नकदी आ गहना लूटि लेलक। शोरूमक एकटा कर्मचारीक अनुसार, तनिष्क शोरूमक पहिल मंजिल पर ३ टा बदमाश ग्राहक बनि आयल आ गहना देखाबय लेल कहलक। लगभग १० मिनट धरि सेल्समैनकेँ उपद्रवी अपन बातचीतमे उलझा कऽ रखलक आ रेकी सेहो करैत रहल। रेकी करैत काल ओ अपन तीनू सहकर्मीकेँ बजौलक।
जहिना तीनू उपद्रवी भीतर आयल, पहिनेसँ उपस्थित उपद्रवी सेहो हरकतमे आबि गेल आ ओ सभ अपन हथियार निकालि लेलक। बादमे, शो रुममे दाखिल तीनू लुटेरा बंदूकक नोकपर नीचांक सभटा कर्मचारीकेँ लऽ कऽ ऊपरी मंजिल पर लऽ गेल। ओ गार्ड सहित सभ कर्मचारीकेँ एक ठाम बैसबाक लेल कहलक। ओही समय २ टा बदमाश निचां आ २ टा ऊपरी मंजिल पर संग आनल गेल पैघ बैगमे गहना आ नकदी भरय लागल। शेष २ उपद्रवी कर्मचारी सभकेँ बन्दूकक नोक पर रखने छल।
ई घटना १०-१५ मिनटमे भेल।
सभ शरारती तत्वक आयु २० सँ २५ वर्ष कहल जा रहल अछि। उपद्रवी सभ १० सँ १५ मिनटमे ई पैघ डकैती कऽ देलक। उपद्रवी सभक हाथ करोड़ो मूल्यक गहना आ नकदी लागल अछि। पूरा घटना सीसीटीवी कैमरामे कैद भऽ गेल अछि।
आश्चर्यजनक रूपसँ उपद्रवी सभ अपन मुँह पर मास्क तक नहिं लगेने छल, मात्र दूटा बदमाश मास्क पहिर डकैतीक घटना कऽ रहल छल। एहि घटनाक बाद दू टा बाइक पर ट्रिपल लोडिंग सवार भऽ अलग-अलग रास्तासँ आसानीसँ सभ भागि गेल।
भागैत काल एकटा बदमाशक पिस्तौल सेहो खसि पड़ल। एहि घटनाक समाचार पूरा शहरमे आगि जकाँ पसरि गेल। घटनास्थल पर पैघ संख्यामे लोक जमा भेलाह। घटनाक सूचना भेटलापर पूर्णियाक एसपी उपेन्द्रनाथ वर्मा आ डीआईजी विकास कुमार घटनास्थल पर पहुँचलाह आ घटनाक जानकारी लेलनि। स्थानीय निवासी अमरेश कुमार कहलनि जे ओ शोरूम लग रहैत छथि आ दुपहरिया लगभग १२ बजे तीनटा लोककेँ शोरूममे प्रवेश करैत देखलनि। मुदा हुनका सभ किछु सामान्य लागल।
हुनका सोझेँ तीन गोटे बाहर निकलल, तखन शोरूमक कर्मचारी ‘गोली मारि देलक, गोली मारि देलक’ कहि भागैत देखल गेल। तखन हुनका लोकनिकेँ डकैतीक घटनाक जानकारी भेटल। अपराधी सभ शोरूम लग एकटा नर्सिंग होमक सोझाँ बाइक ठाढ़ कयने छल। ओहि पर चढ़ैत काल एक टाकेँ पिस्तौल खसि पड़ल। जकरा एकटा ऑटो चालक उठा लेलक। ओकरा सेहो पुलिस बरामद कए लेलक अछि। घटनाक वारदात देखि एहेन प्रतीत भऽ रहल अछि कि सभ लुटेरा बाहरक छल।
