बिहार बंद केर दौरान मुजफ्फरपुरमे राजनीतिक तनाव तखनि बढ़ल जखनि राजद समर्थक भाजपाक वरिष्ठ नेत्री आओर पूर्व सांसद रमा देवीक गाड़ीकेँ घेरि लेलक। ई घटना अहियापुर थाना क्षेत्र केर जीरो माइल चौकक समिप घटित भेल, जतय रमा देवी केर गाड़ी बंदक दौरान राजद कार्यकर्ताक प्रदर्शन स्थल पर पहुंचि गेल।
सूत्रक अनुसार रमा देवी शिवहरसँ घुरैत काल जाममे फंसल छलीह आ जखनि हुनकर गाड़ी जीरो माइल चौक लग पहुंचल तs ओतय मौजूद राजद कार्यकर्ता हुनका चिन्हलनि।
देखैत-देखैत कार्यकर्ता सब हुनकर गाड़ीकेँ चारू कातसँ घेरि लेलक आ नारा लगाबय लागल। ‘गो बैक मोदी’, ‘भाजपा मुर्दाबाद’ आ ‘रमा देवी वाप्स जाओ’ सन नारा हवामे गूंजय लागल। राजद समर्थक झंडा लहराबैत भाजपा विरोधी नारा लगा कs गाड़ीकेँ आगू बढ़यसँ रोकलक।
किछु समय धरि स्थिति तखनि तनावग्रस्त भs गेल जखनि रमा देवीक संग मौजूद सुरक्षाकर्मी गाड़ीसँ उतरि कार्यकर्ता सभकेँ रास्ता देबाक अपील करय लगलाह। सुरक्षाकर्मीक प्रयास केर बावजूद राजद कार्यकर्ता गाड़ीकेँ आगू नहिं बढ़य देलक. स्थिति देखि रमा देवी केर गाड़ीके अंततः पाछू घुमाबय पड़लनि।
प्रत्यक्षदर्शी केर अनुसार ई पूरा घटना लगभग दस मिनट तक चलल, जाहि दौरान पासमे उपस्थित लोक सेहो दर्शक बनल रहल। ध्यान देबऽ वाला बात अछि कि राजद, कांग्रेस आ वामपंथी दल केर समर्थन वाला मतदाता सूची केर विशेष संशोधन केर विरोधमे महागठबंधन बिहार बंदक आह्वान कयलक। एहि बंदक दौरान राजनीतिक दल केर बीच सीधा टकरावक ई पहिल पैघ घटना मानल जा रहल अछि। घटनाक बाद पूर्व सांसद रमा देवी केर तरफसँ यद्यपि कोनो औपचारिक बयान नहिं आयल अछि. मुदा स्थानीय भाजपा नेता एकरा लोकतंत्र पर हमला बताबैत कहलनि अछि जे राजद कार्यकर्ता गुंडागर्दी पर उतरि गेल अछि। एहि पूरा घटनामे मौका पर कोनो पुलिस तैनाती नहि देखल गेल। घटना केर बाद स्थानीय प्रशासन आ पुलिस केर भूमिका पर सेहो सवाल उठय लागल अछि।
