राजद नेता तेजस्वी यादवक एस्कॉर्टक गाड़ी दुर्घटनाग्रस्त, चालकक मृत्यु, ६ पुलिसकर्मी सहित ९ घायल

पटना
*

बिहारक मुख्य विपक्षी दल राष्ट्रीय जनता दलक नेता तेजस्वी यादवक जनविश्वास यात्राक दौरान सुरक्षामे तैनात एकटा एस्कॉर्ट वाहन एकटा कारसँ टकरा गेल।
एकटा पुलिस अधिकारी बतौलनि जे एहि दुर्घटनामे एस्कॉर्ट वाहनक चालकक मौकापर मृत्यु भऽ गेल, जखन कि छओ अन्य पुलिसकर्मी सहित नौ गोटे घायल भऽ गेलाह।

दुर्घटनाक पुष्टि करैत पुलिस अधीक्षक उपेन्द्र नाथ वर्मा कहलनि जे सभटा घायलकेँ इलाजक लेल सरकारी मेडिकल कॉलेज ओ अस्पतालमे भर्ती कयल गेल अछि।

हादसामे मौत भेल वाहन चालक होमगार्ड जवानक नाम मोहम्मद हलीम आलम अछि, जे मधुबनीक निवासी छलाह।

सदर अनुमंडल पुलिस अधिकारी पुष्कर कुमार कहलनि जे कार एस्कॉर्ट वाहनसँ टकरा गेलासँ बीएमपीक छओ जवान गम्भीर रूपसँ घायल भऽ गेलाह। एहि दुर्घटनामे कारमे सवार तीन गोटे सेहो घायल भऽ गेलाह। दुर्घटनाक बाद कारक एयरबैग खुललाक कारण, कारमे सवार लोक सभकेँ बेसी चोट नहिं लागल, ओ सभ खतरासँ बाहर छथि। सभक उपचार राजकीय मेडिकल कॉलेज अस्पतालमे कराओल जा रहल अछि।
ई दुर्घटना पूर्णिया-कटिहार सड़क मार्ग पर एकटा निजी विवाह भवन लग भेल।