उत्तराखंडक धरालीमे प्राकृतिक आपदाक बाद युद्धस्तर पर रेस्क्यू ऑपरेशन चलाओल जा रहल अछि। भारत-तिब्बती सीमा पुलिस (आईटीबीपी) केर डीआईजी (ऑपरेशन) बरिंदरजीत सिंह कहलनि जे, आईटीबीपीक पांच टीमकेँ मौका पर भेजल गेल अछि, जाहिमेसँ तीन टीम फिलहाल बचाव अभियानक हिस्सा अछि। हरशील आ गंगोत्री क्षेत्रमे टीम राहत आ बचाव कार्यमे लागल अछि।
डीआईजी बरिंदरजीत सिंह कहलनि जे रातिमे भेल अभियानक दौरान करीब 110 लोककेँ बचाओल गेल, जाहिमे पर्यटकक संग-संग स्थानीय लोक सेहो शामिल छथि। किछु गोटेकेँ गंगोत्री धाम दिसि पठाओल गेल, जखनि कि घायलक प्राथमिक चिकित्सा कयलाक बाद आईटीबीपी चौकी पर आनल गेल।
ओ कहलनि जे, बुधदिन भोरमे युद्धस्तर पर ऑपरेशन शुरू कयल गेल। हर्षिलमे सेहो एयर रेस्क्यू शुरू भऽ गेल अछि। करीब पांच गोट घायल केर बचाओल गेल अछि। दोसर दिसि फंसल लोककेँ बचाबय लेल अस्थायी पुल बनाओल जा रहल अछि। एहि ठाम किछु सीमावर्ती इलाकासँ आनल गेल बीआरओ मशीन लगाओल गेल अछि। किछु लोक अपनाकेँ बचाबय लेल पहाड़ पर गेल छलाह, हुनका सभकेँ सेहो बचाओल जा रहल अछि।
डीआईजी कहलनि जे, करीब 7 गोटे लापता छथि। ४ गोटेकेँ मृत्युक पुष्टि भेल अछि, जाहिमे बुधदिन भोरमे एक गोटेक शव बरामद भेल अछि।
ओ कहलनि जे, मौसमक पूर्वानुमान अछि, मुदा एकर कोन तरहक प्रभाव पड़त से पता करब मुश्किल अछि। हमर सबहक सेना सदिखन सतर्क रहैत अछि। ज्ञात छल जे लगातार बरखा भऽ रहल अछि, मुदा एहेन मेघ फटबाक घटना हेबाक अनुमान ककरो लेल मुश्किल अछि।
डीआईजी बरिंदरजीत सिंह कहलनि जे, ऑपरेशनमे बरखा एकटा पैघ चुनौती बनि रहल अछि। मौसम अनुकूल नहिं रहलाक कारण बचाव दलकेँ दिक्कतक सामना करय पड़ि रहल अछि। मौसम अनुकूल रहत तँ ऑपरेशनमे तेजी आओत। मुदा भविष्यमे सेहो बरखाक संभावना अछि, एहिसँ हवाई रेस्क्यू बचावमे ब्रेक लागि सकैत अछि।
सीमावर्ती क्षेत्रक स्थिति पर डीआईजी स्पष्ट कयलनि जे भारत-चीन सीमा पर कोनो तरहक अप्रिय घटनाक सूचना नहि अछि। आपदा केर असरि मुख्य रूपसँ घाटी क्षेत्रमे महसूस कयल गेल अछि, जतय किछु जगह पर भूस्खलन आ सड़क पर रुकावट बनल अछि।