विदित अछि जे दैनिक राष्ट्रीय अखबार मैथिल पुनर्जागरण प्रकाश, मिथिलाक्षर साक्षरता अभियान, मिथिलाक पहिचान मिथिलाक्षर निशान सन जनोपयोगी उपक्रमक संस्था “मैथिल पुनर्जागरण प्रकाश फोरम” अपन चारिम मुख्य उपक्रम ‘पुनर्जागरण शिक्षण-प्रशिक्षण संस्थान’क शुभारंभक घोषणा कयलक अछि।
एहि संस्थानक शुरुआत ‘नि:शुल्क बेसिक काॅम्प्यूटर DCA एवं टाइपिंग (देवनागरी/ English) 06 Months Certificate Course केर शिक्षण-प्रशिक्षणसँ होबय जा रहल अछि।
एहि लेल प्रथम बैच १०० चयनित मेधावी छात्र-छात्राक संग शुभारंभ होयत। एहि लेल चयन-प्रक्रिया एना अछि जे विद्यालय/महाविद्यालयमे एकटा सामान्य ज्ञान ५० अंकक ०१ घंटाक परीक्षाक आयोजन द्वारा कयल जाएत। एखनि आरंभ मधुबनीसँ कयल जा रहल अछि, धीरे-धीरे एकर विस्तारक योजना छैक।
एहि क्रममे विद्यालय/महाविद्यालय आ सामाजिक समूह सभमे संपर्क अभियान चलाओल जा रहल अछि, जाहि केर अंतर्गत चारि सदस्यीय एकटा टीम आइ मधुबनीक सरकारी वाटसन हाई स्कूलमे प्रधानाचार्य अजीत कुमार साहूसँ भेंट कयलनि आ योजनासँ अवगत करौलनि। मिलनसार ओ विवेकवान प्रधानाचार्य अजीत कुमार साहू एहि उपयोगी शिक्षण काजक लेल योजनाक सराहना करैत पूर्ण सहयोगक बात कहलनि।
पुनः ई चारि सदस्यीय टीम मधुबनीक रिजनल सेकेंडरी स्कूल पहुंचल आ निदेशक राम शृंगार पाण्डेयसँ भेंट कयलक संगमे प्राचार्य मनोज झा सेहो छलथि। आत्मियतासँ भरल आ जानल-मानल निदेशक राम शृंगार पाण्डेय एहि काजक सराहना करैत पूर्ण रुपसँ समर्थने टा नहिं बल्कि मार्गदर्शन करैत सहयोगक आश्वासन देलनि।
एहि सभसँ पूर्व एहि उपक्रमकेँ मधुबनीक जिला शिक्षा पदाधिकारी (DEO) केर संज्ञानमे दऽ देल गेल अछि।
