राहुल गांधीक जन्मदिन पार्टी कार्यकर्ता सभ धूमधामसँ मनौलनि

बेनीपुर समदिया
*

कांग्रेस पार्टीक पूर्व राष्ट्रीय अध्यक्ष सह संसदमे नेता प्रतिपक्ष राहुल गांधीक जन्मदिन बेनीपुरमे पार्टीक कार्यकर्ता धूमधामसँ मनौलनि। ओहि अवसर पर कार्यकर्ता सभ गरीब , विधवा महिला सबहक बीच वस्त्र बाँटिकय समारोहकेँ यादगार बनेलनि । कार्यक्रममे कांग्रेस नेता सभ राहुल गांधीक नेतृत्व आ देशमे एकता आ भाईचाराक हुनकर संदेशकेँ जमिकय सराहना कयलनि।

एहि दौरान पूर्व महागठबंधनक प्रत्याशी मिथिलेश कुमार चौधरी कहलन्हि जे कांग्रेस देशक एकमात्र ऐहन पार्टी अछि , जे सभ धर्म आ वर्गक सम्मान करैत राष्ट्रक तरक्की लेल काज करैत अछि। ओ राहुल गांधीकेँ सांप्रदायिकता आ नफरत पसारयवाला ताकतिक खिलाफ मोहब्बतक संदेश देबयवाला नेता बतेलनि।

चौधरी जोर दऽ कऽ कहलनि कि कांग्रेस कार्यकर्ता धर्मक नाम पर राजनीति करयवालकेँ सबक सिखाबय आ देशक एकता एवं अखंडताकेँ मजबूत करय लेल प्रतिबद्ध अछि। एकर संगहि ओ कहलनि कि बिहारमे डबल इंजनक सरकार युवा सभकेँ रोजगार , पलायन रोकय आ अपराध नियंत्रण जेहेन मुद्दा पर विफल रहल अछि। राहुल गांधीक जातिगत जनगणनाक मुद्दा पर केंद्र सरकारकेँ घुटना टेकय पड़ल।

माई-बहिन मान योजना केर माध्यमसँ प्रत्येक पात्र महिलाकेँ 2500 टाका प्रति मास महागठबंधनक सरकार बनला पर देबाक बात सेहो चौधरी बतेलनि। प्रखंड अध्यक्ष देवकीनंदन ठाकुर कहलनि जे देशमे बढ़ैत महंगाई , बेरोजगारी आ सामाजिक असमानता एहेन मुद्दा सभ पर राहुल गांधी जनताक बीच रहिकय संघर्ष कऽ रहल छथि । ओ जातिगत जनगणना आ जनताक समस्याकेँ संसदमे उठेबाक लेल राहुल गांधीक मुहिमकेँ ऐतिहासिक बतेलनि।

एहिमे प्रदीप ठाकुर , रामेन्द्र मोहन झा , जितेन्द्र झा, विन्द्यनाथ ठाकुर, रामाधार ठाकुर, त्रिपुरी ठाकुर सहित सैकड़ो लोक उपस्थित छलाह।