बिहारक उपमुख्यमंत्री विजय सिन्हा सदनमे राहुल गाँधीक भाषण पर तीखा प्रतिक्रिया देलनि अछि। ओ राहुल गाँधीपर हिन्दू धर्म आ भारतीय संस्कृतिक अपमान करबाक आरोप लगओलनि अछि। हिन्दू धर्म आ भारतीय संस्कृतिक प्रति हुनक दृष्टिकोणक कड़ा आलोचना कयलनि। ओ कांग्रेस पार्टीक नीति आ इतिहासपर सेहो सवाल उठौलनि। एहि बयानक बाद राजनीतिक माहौलमे आओर गर्मीक संभावना अछि।
विजय सिन्हा मंगलदिन एतय मीडियाकेँ कहलनि जे सोनाक चम्मच लऽ कऽ जन्मल राहुल गांधी सदनमे हिन्दूसभ पर हमला कऽ रहल छथि। ओ कहलनि जे राहुल गाँधीकेँ लाँच करबाक तीन बेर प्रयास कयल गेल, मुदा ओ हर बेर असफल रहलाह। ओ सवाल उठौलनि जे पाँच बेर सांसद रहि चुकल लोकक लेल एहन बयान देब अनुचित अछि आ कहलनि जे राहुल गाँधी संसदक लेल योग्य नहिं छथि।
उप मुख्यमंत्री विजय सिन्हा कहलनि जे राहुल गाँधी हिन्दूसभकेँ आतंकवादी कहि भारतीयसभक अपमान कऽ रहल छथि। ओ कहलनि जे हिन्दूकेँ सहिष्णु मानल जाइत अछि, मुदा राहुल गाँधी हुनका हिंसक कहि रहल छथि। महात्मा गाँधीक अन्तिम शब्द ‘राम’ छल आ कांग्रेसपर सिखसभक हत्या करबाक आरोप लगओलनि। ओ कहलनि,”पश्चिम बंगालमे जे भऽ रहल अछि ओकर समर्थन कऽ राहुल गांधी सनातन धर्मकेँ समाप्त कऽ रहल छथि।
ओ आरोप लगओलनि जे राहुल गांधी राजदक संग छथि जे रामचरित मानसक अपमान करैत अछि आ तृणमूल कांग्रेसक सङ्ग घेंटजोड़ी कऽ रहल अछि। “पहिने नेहरू, फेर इन्दिरा गाँधी आ बादमे राजीव गाँधी हिन्दूसभक अपमान कयलनि। पी चिदम्बरम हिन्दूसभकेँ आतंकवादी कहलनि आ कांग्रेस हिन्दू आतंकवादक नाम देलक।
विजय सिन्हा आरोप लगओलनि जे २००२ मे राहुल गाँधी हिन्दूसभकेँ देशसँ बाहर निकालबाक बात कयने छलाह। ओ कहलनि जे चुनावक समय राहुल गाँधी जनेऊ पहिर हिन्दू वोट प्राप्त करबाक नाटक करैत छथि, मुदा संसद आ संसदक बाहर हिन्दूसभक अपमान करैत छथि।
संसदमे भगवान शिवक चित्र देखाकऽ ओ लोकनि तुष्टीकरणक राजनीति कऽ रहल छथि आ देशमे इतालवी संस्कृतिकेँ लागू करय चाहैत छथि। साल २०१४ मे ईश्वरक शपथ लेलाक बाद ओ ईश्वरक नाम नहिं लेलनि। विजय सिन्हा कहलनि जे राहुल गांधी नर नहिं, पशुक समान छथि।
