कांग्रेस नेता राहुल गांधी पश्चिम बंगालमे भेल रेल दुर्घटनाक लेल केन्द्र सरकारकेँ दोषी ठहरौलनि अछि। हुनकर कहब छनि जे रेल दुर्घटनाक कारण कुप्रबंधन आ उपेक्षा अछि। ओ रेल दुर्घटनापर सवाल उठयबाक आ केन्द्र सरकारक जवाबदेही सुनिश्चित करबाक बात सेहो कहलनि।
राहुल गाँधी कहलनि जे पछिला १० सालमे रेल दुर्घटनामे भेल वृद्धि सीधा मोदी सरकारक कुप्रबंधन आ उपेक्षाक परिणाम अछि, जाहिसँ दिन-प्रतिदिन यात्रीसभक जान-मालक क्षति होइत अछि। एखनुक दुर्घटना एहि वास्तविकताक एकटा आओर उदाहरण अछि। एकटा जिम्मेदार विपक्षक रूपमे हम एहि भयावह नजरअंदाजी पर सवाल उठाबैत रहब आ एहि दुर्घटनाक लेल मोदी सरकार केर जवाबदेह बनबैत रहब। ओ एहि दुर्घटनामे मारल गेल लोकक प्रति संवेदना व्यक्त कयलनि अछि। ओ कहलनि, “पश्चिम बंगालमे कंचनजंगा एक्सप्रेसक दुर्घटनामे कतेको लोकक मृत्युक समाचार बहुत दुखद अछि। हम सभ शोक संतप्त परिवारक प्रति संवेदना व्यक्त करैत छी आ घायलक शीघ्र स्वास्थ्यलाभक आशा करैत छी। सरकारकेँ तत्काल सभटा पीड़ित वा हुनक परिवारकेँ पूरा मुआवजा देबाक चाही। कांग्रेस कार्यकर्ता सभसँ अनुरोध अछि जे ओ राहत आ बचाव प्रयासमे हरसंभव सहायता प्रदान करथि।”
पश्चिम बंगालक न्यू जलपाईगुड़ीमे एकटा रेल दुर्घटनामे कतेको यात्री घायल भऽ गेलाह आ आठ गोटेक मृत्यु भऽ गेल। घटनाक अनुसार, एकटा मालगाड़ी सियालदह जा रहल कंचनजंगा एक्सप्रेसकेँ पाछूसँ टक्कर मारि देलक। टकरावक कारण कंचनजंगा एक्सप्रेसक कतेको डिब्बा पटरीसँ उतरि गेल। ई दुर्घटना सोमदिन भोर लगभग ९ बजे भेल। मालगाड़ी अगरतलासँ सियालदह जा रहल कंचनजंगा एक्सप्रेसमे टक्कर मारलक।
