केंद्रीय मंत्री चिराग पासवान कांग्रेस सांसद राहुल गांधीकेँ निशाना बना तीक्षण टिप्पणी कयलनि अछि। राहुल गांधीकेँ ‘वोट चोरी’ केर आरोप पर चिराग पासवान कहलनि जे, विपक्षी नेताक पास कोनो सबूत नहि अछि। बस मीडियाक सामने आबि तमाशा ठाढ़ कय दैत छथि। संगहि ओ सवाल उठेलनि जे विपक्षी नेतामे एहेन बुद्धि अछि जे ओ संसदकेँ काज नहि करय दऽ रहल छथि।
चिराग पासवान कहलनि जे, हम सब सेहो ई बात कहि रहल छी, अहाँ सब शिकायत करैत रहैत छी जे बिहारसँ एतेक नाम डिलीट भऽ गेल अछि, एतेक शिकायत आबि रहल अछि। एकटा राजनीतिक दलक रूपमे ई सेहो अहांक जिम्मेदारी अछि जे जँ अहांकेँ एहेन शिकायत भेटि रहल अछि तँ कमसँ कम एक बेर चुनाव आयोगमे जाउ आ अपन बात राखू, कियाक तँ हुनका सब लग कोनो सबूत नहि अछि। ई लोक सब बस आबि कय हंगामा मचाबैत छथि।
पटनामे पत्रकारसँ गप करैत चिराग पासवान कहलनि जे विपक्ष संसदमे एसआईआर पर चर्चाक मांग कय रहल अछि, मुदा राहुल गांधीकेँ ई कहबाक चाही जे एकर जवाब के देत ? जँ ओ हमरा ई बात कहताह तखनि हम स्वयं सरकारसँ गप्प कय चर्चा करब। ओ पूछलनि जे की विपक्ष चाहैत अछि जे चुनाव आयोग संसदमे आबि जवाब दय ?
ओ कहलनि जे कांग्रेस आ राजद दुनू पुरान पार्टी अछि, मुदा ई पार्टी बकवास बजैत अछि। निर्वाचन आयोग एकटा प्रक्रियाक पालन कयलक अछि। विपक्षी दल एहि बातसँ असहमत अछि। ओ स्पष्ट कयलनि जे एहिमे सरकारक कोनो भूमिका नहि अछि, ताहि लेल विपक्षी दलकेँ चुनाव आयोगमे जा कय अपन आपत्ति दर्ज करा संसदक काज करबा देबाक चाही।
मतदाता सूचीक संबंधमे ‘कांग्रेस सरकार आबय पर कार्यवाही’ केर टिप्पणी पर चिराग पासवान सेहो प्रतिक्रिया देलनि। ओ राहुल गांधी पर तंज कसैत कहलनि जे अहाँ दिवास्वप्न देखि रहल छी। एनडीए सरकार कतेको साल धरि केंद्रमे रहय जा रहल अछि।
संगहि ओ आरोप लगौलनि जे कांग्रेस सन दल मात्र एकटा व्यक्तिकेँ घेरवाक प्रयासमे देशक संवैधानिक संस्था पर सवाल ठाढ़ करैत अछि। ई सभ सेनाक बहादुरी पर सवाल ठाढ़ कयलनि। हुनक नेता पाकिस्तान आ राष्ट्र विरोधी लोकक आवाज बनि जाइत अछि। देशक आवाज बनबाक बदला दुश्मन देशक आवाज बनि जाइत छथि, एहिसँ बेसी भयावह किछु नहि भऽ सकैत अछि।
