भीड़केँ भड़काबय लेल राहुल गांधीक विरुद्ध केस दर्ज करत डीजीपी – मुख्यमंत्री असम
*
गुवाहाटी
*
राहुल गाँधीक नेतृत्ववला भारत जोड़ो न्याय यात्राकेँ मंगलदिन गुवाहाटीमे प्रवेश करबासँ रोकल गेल, जकर बाद कांग्रेस कार्यकर्ता विरोध प्रदर्शन शुरू कऽ देलनि आ बैरिकेड तोड़ि नाराबाजी कयलनि। बादमे गाँधी शहरक बाहरी इलाकामे पार्टी समर्थकसभकेँ सम्बोधित करैत कहलनि, “हमसभ बैरिकेड तोड़ि देने छी, मुदा कानून नहिं तोड़ब।”
यात्राकेँ शहरक सीमामे प्रवेश करबासँ रोकबाक लेल दू ठाम बैरिकेड लगयनिहार पुलिसकेँ कांग्रेस कार्यकर्तासभकेँ रोकबाक लेल बलक प्रयोग करय पड़ल। एहिसँ पहिने जखन गाँधी गुवाहाटीमे प्रवेश करबाक प्रयास कयलनि तखन हुनक जोरदार स्वागत कयल गेल आ बाटमे ओ विश्वविद्यालयक किछु छात्रसभकेँ सम्बोधित कयलनि। समर्थकसभकेँ सम्बोधित करैत ओ कहलनि जे भाजपा अध्यक्ष जे पी नड्डा सेहो एही मार्गसँ गेल छलाह, मुदा हुनका (राहुल) एहि पर यात्रा करबाक अनुमति नहिं देल गेल।
अपन कार्यकर्ता आ समर्थककेँ “बब्बर शेर” कहैत ओ कहलनि, “अहाँकेँ ई नहिं सोचबाक चाही जे हम कमजोर छी। हम सभ बैरिकेड तोड़ि देने छी। ओ विश्वविद्यालयमे हमर कार्यक्रम रद्द कए देलखिन। मुदा छात्र सभ हमरा बाहर सुनलक। कांग्रेस कार्यकर्ता केकरोसँ नहिं डरैत छथि। हम असममे भाजपाकेँ पराजित करब आ जल्दिये कांग्रेसक सरकार बनत।”
ओ नीक काज करबाक लेल पुलिसक सेहो सराहना कयलनि। “हमसभ जनैत छी जे पुलिस अधिकारी नीक काज कयने छथि आ आदेशक पालन कयलनि, एकटा आदमी आबि (यात्रा) बसक सोझाँ पड़ि गेल। हम अहांक खिलाफ नहिं छी। हम ओहि मुख्यमंत्रीक खिलाफ छी जे सबसँ बेसी भ्रष्ट छथि। हमर लड़ाई ओकर संग अछि।”
ओ कहलनि जे पुलिसकर्मी सेहो हुनक भाषणक लेल ताली बजा रहल छथि, मुदा कहलनि जे ई नहिं कयल जयबाक चाही। एआईसीसीक असमक प्रभारी जितेन्द्र सिंह कहलनि, “हमसभ जीतलौंह, किएक तँ हम बैरिकेड तोड़ि देलौंह अछि।”
मुख्यमंत्री पहिने कहने छलाह जे ट्रैफिक जामसँ बचबाक लेल यात्राकेँ शहरमे प्रवेश नहिं देल जायत।
सोमदिन मेघालयमे प्रवेश करयवला ई यात्रा अपन अन्तिम चरणक लेल असम घुरि आयल अछि आ राज्यक सबसँ पैघ शहर गुवाहाटीक बाहरी इलाकासँ गुजरत। ई यात्रा बृहस्पति धरि असममे रहत।
