राहुल असमक लेल गिनौलनि कांग्रेसक पाँच गारंटी, सरमाकेँ कहलनि भ्रष्ट सीएम

कामरूप । समदिया

लोकसभामे विपक्षक नेता राहुल गांधी असमक कामरूपमें एकटा जनसभाकेँ संबोधित कयलनि। एहि दौरान ओ मुख्यमंत्री हिमंत बिस्वा सरमा आ प्रधानमंत्री नरेंद्र मोदी पर तीक्षण हमला कयलनि। राहुल गांधी असमक जनता लेल न्याय आ विकासक नव रोडमैप पेश करैत कतेको पैघ घोषणा कएलनि।

राहुल गांधी कहला जे असमक मुख्यमंत्री देशक सभसँ भ्रष्ट मुख्यमंत्री छथि। हुनकर मुखसँ 24 घंटा घृणा आ हिंसाक भाषा निकलैत अछि। राहुल आरोप लगौलनि जे मुख्यमंत्री आब अपन परिवारकेँ सेहो भ्रष्टाचारमे शामिल कए लेने छथि। ओ दावा कएलनि जे कानून एक दिन हुनका जरूर पकड़त आ ओ जेल जायत।

अपन संबोधनमे राहुल गांधी पीएम मोदी पर सेहो जोरदार हमला कएलनि। ओ कहला जे नरेंद्र मोदी आ अमित शाह असमक मुख्यमंत्रीकेँ नियंत्रित करैत छथि। प्रधानमंत्री पर हमला करैत राहुल कहला जे अडानी भाजपाक आर्थिक ढाँचा छथि। ओ एहि कंपनीकेँ मोदानी नाम देलनि आ कहला जे ई मोदी आ अडानी दुनू केर अछि।

अपन संबोधन केर दौरान राहुल गांधी असममे कांग्रेस केर सरकार बनला पर कतेको गारंटी देलनि। राहुल वादा कयलनि जे –

सरकार बनला पर 100 दिन केर भीतर जुबीन गर्ग केर न्याय देल जाएत।

महिलाकेँ हर मास हुनकर बैंक खातामे बिना कोनो शर्तक नकद राशि पठाओल जाएत।

अपन खुदकेँ व्यवसाय शुरू करए वाली असमक हर महिलाकेँ 50,000 रुपैयाक शुरुआती राशि देल जाएत।

10 लाख लोकक ‘एकसोनिया पट्टा’ (वार्षिक जमीन परमिट) केर ‘म्यादि पट्टा’ (स्थायी मालिकाना हक) मे बदलल जाएत।

बुढ़केँ हर मास 1250 रुपैयाक पेंशन देल जाएत। एहि लेल सरकारमे एकटा अलग विभाग सेहो बनाओल जाएत।

हर परिवारकेँ इलाज लेल 25 लाख रुपैयाक कैशलेस हेल्थ कवर केर सुविधा देल जाएत।

एहि केर अलावा राहुल गांधी छह आदिवासी समुदायकेँ एसटी (ST) केर दर्जा देबाक भरोसा सेहो देलनि। ओ कहला जे मुख्यमंत्री केर विचारधारा आ जुबीन गर्ग केर विचारधारामे जमीन-आसमानक अंतर छै। राहुल विश्वास व्यक्त कयलनि जे असमक जनता एहि बेर बदलाव लेल तैयार अछि।