बिहार राज्य विश्वविद्यालय एवं महाविद्यालय कर्मचारी महासंघक आह्वान पर 11 सूत्री मांगक समर्थनमे सीएम साइंस कालेजक शिक्षकेत्तर कर्मचारी सोम आ मंगलकें कारी बिल्ला लगा अपन कार्यक निष्पादन कयलनि। महाविद्यालयक शिक्षकेत्तर कर्मचारी संघक अध्यक्ष राधेश्याम झा बतेलनि जे पूर्व निर्धारित कार्यक्रमक अनुसार कारी बिल्ला लगा कऽ अपन काजक संपादन कऽ कर्मचारी लोकनि अपन दायित्वक निर्वहन कयलनि।
जखन कि 16 अक्टूबरसँ सामूहिक अवकाश पर रहि कर्मचारीक हितसँ जुड़ल 11 सूत्री मांगक समर्थनमे ललित नारायण मिथिला विश्वविद्यालय केर मुख्यालय पर महासंघ केर बैनर तर आयोजित धरना प्रदर्शनमे भाग लेताह।
संघक सचिव अनुपम कुमार झा कहलनि जे एहि सांकेतिक विरोधक मूलभूत उद्देश्य कर्मचारीक हितसँ जुड़ल मांग दिसि सरकार आ विश्वविद्यालय प्रशासनक ध्यान आकर्षित करब अछि। 11 सूत्री मांगमे वेतन सत्यापन कोषांग, पटना द्वारा वेतन सत्यापन लेल कयल जा रहल मनमाना अग्रसारण पर अविलंब रोक लगाओल जयबाक संगहि विश्वविद्यालय आदेश, विश्वविद्यालय परिनियम, न्यायादेश केर आलोकमे वेतन सत्यापन कोषांग केर अग्रसारणमे सुधार कयल जायब, सभ अंगीभूत महाविद्यालयमे प्रधान सहायक आ लेखापालकें प्रशाखा पदाधिकारी पदनामित करब, प्रोन्नति प्रभार केर प्रतीक्षारत कर्मचारी केर अविलंब पदस्थापना करब, अनुकंपा पर अविलंब बहाली, समस्तीपुर कॉलेज केर कर्मीक अकारण कयल गेल स्थानांनतरणकें अविलंब वापस करब, सप्तम वेतन केर लंबित शेष राशि केर अविलंब भुगतान करब आदि मांग शामिल अछि। मंगल दिन कारी बिल्ला लगा काज कयनिहार कर्मचारीमे शिवशंकर झा, उमेश कुमार ठाकुर, रोहित कुमार झा, प्रवीण कुमार झा, आकाश कुमार वर्मा, आदित्य नाथ झा, जितेंद्र राम, जितेंद्र कुमार महतो, लीला कुमारी, ज्योति कुमारी, अनुराधा कुमारी, जरीना खातून, चंद्र कांत चौधरी, दिलीप मंडल, सतीश कुमार, रमेश कुमार कामती, जयकांत कामती, राजेश कुमार सिंह, अनुपम शेखर सिंह, संतोष कुमार, मिसरी साह, युगेश्वर महतो, रामशंकर भंडारी, कुमार राजर्षि आदि शामिल छलाह।
