बिहारक नीतीश कुमार कैबिनेट राज्यमे पंचायत प्रतिनिधिकेँ देल जाय वाला मासिक मानदेय बढ़ाबय केर मंजूरी देलक अछि। नीतीश सरकारकेँ एहि फैसलासँ दू लाख ३५ हजार १४८ पंचायत प्रतिनिधिकेँ फायदा होएत। लोकसभा चुनावसँ पहिने ई नीतीश सरकारक मास्टर स्ट्रोक मानल जा रहल अछि। सोमदिन भेल मंत्रिमंडलक बैसारमे १९टा प्रस्तावकेँ मंजूरी देल गेल अछि।
कैबिनेट बैठक के बाद ई जानकारी दैत कैबिनेट सचिवालयक अपर मुख्य सचिव एस सिद्धार्थ कहलनि कि आब ग्राम पंचायतक मुखिया आ उप मुखियाकेँ ५००० आ २५०० रुपया मासिक मानदेय भेटत।
तहिना सरपंच आ उपसरपंचक मानदेय बढ़ा देल गेल अछि। सरपंचकेँ आब ५,००० रुपया (पहिने २५०० रुपया) आ उपसरपंच के २५०० रुपया (पहिने १२०० रुपया) भेटत। संगहि वार्ड सदस्यकेँ मानदेय ५०० रुपयासँ बढ़ा कय ८०० रुपया कय देल गेल अछि।
आंगनबाड़ी कार्यकर्ताकेँ प्रति माह ५९५०सँ ७,००० रुपया एवं सहायिकाकें २९७५ टकासँ ४००० रुपया प्रति माह भेटत। हालहिमे आंगनवाड़ी कार्यकर्ता लोकनि मानदेय बढ़ेबाक लेल पटनाक सड़कपर जोरदार प्रदर्शन कयने छलीह।
मंत्रिमंडल राज्यमे खेलकेँ बढ़ावा देबाक लेल आ पदक विजेताक प्रयासकेँ सफल बनयबाक लेल एकटा अलग खेल विभागक गठनकेँ सेहो मंजूरी देलक। एखन धरि बिहारमे खेल इकाई राज्य सरकारक कला, संस्कृति आ युवा मामिला विभागक मात्र हिस्सा छल। संगहि संग बिहार सरकार आईटी क्षेत्रमे निवेश केर बढ़ाबा देबय लेल नवीन सूचना प्रौद्योगिकी (आईटी) नीति – २०२४ केर सेहो मंजूरी देलक अछि।
