बिहार विधान परिषदक पूर्व सभापति पं ताराकांत झाक पुण्य तिथि पर विद्यापति सेवा संस्थानक दिसिसँ शुक्रदिन श्रद्धांजलि सभा आयोजित कयल गेल। संस्थानक प्रधान कार्यालय परिसरमे आयोजित श्रद्धांजलि सभामे संस्थानक कार्यकारी अध्यक्ष डा बुचरू पासवान, मैथिली अकादमीक पूर्व अध्यक्ष पं कमलाकांत झा, धर्मशास्त्री डा श्रीपति त्रिपाठी, विद्यापति सेवा संस्थानक महासचिव डा बैद्यनाथ चौधरी बैजू सहित शहरक अनेक गणमान्य व्यक्ति हुनक चित्र पर श्रद्धा सुमन अर्पित क’ भाव भरल श्रद्धांजलि अर्पित कयलनि।
मौका पर डा बुचरू पासवान हुनक वैशिष्ट्य केर विशेषता आ व्यक्तित्व केर मधुरताक चर्चा करैत कहलनि जे चाहे विचार होय आकि कोनो प्रस्ताव, ओकर प्रस्तुति केर हुनक अद्भुत शैली विशेष रूपसँ आकर्षित करैत छल।
मैथिली अकादमीक पूर्व अध्यक्ष पं कमलाकांत झा विद्यापति स्मृति पर्वकें राजकीय दर्जा दिएबामे हुनक महत्वपूर्ण भूमिका केर विस्तारसँ चर्चा क’ अपन स्मरणांजलि देलनि।
विद्यापति सेवा संस्थानक महासचिव डा बैद्यनाथ चौधरी बैजू कहलनि जे ओ आजीवन मिथिलाक सांस्कृतिक विकास लेल संघर्षरत रहलाह। मिथिलाक विकाससँ जुड़ल अनेक मुद्दा कें ल’ अपन संघर्षक कारण ओ मिथिलाक जन-जन केर स्मृतिमे सदति जीवंत बनल रहताह। मिथिलाक सर्वांगीण विकासक रूपरेखा तैयार करबा लेल ओ मिथिलाक गाम-गाम केर पदयात्रा कयलनि। मिथिलाक समुचित विकास लेल पृथक मिथिला राज्यक गठन हुनक सपना छल।
प्रो जीवकांत मिश्र कहलनि जे मिथिला केर विकास आन्दोलनमे निमाहल अपन भूमिका लेल ओ सभ दिन अमर रहताह। मीडिया संयोजक प्रवीण कुमार झा तारा बाबूकें नीक लोक, कानूनक अद्वितीय विद्वान, मिलनसार स्वभावक लोकप्रिय इमानदार नेता आ मिथिला मैथिली केर विकासक समर्पित हितैषी बतेलनि।
श्रद्धा सुमन अर्पित कयनिहार अन्य गणमान्य लोकमे प्रो बाबूसाहेब झा, विनोद कुमार झा, प्रो विजय कांत झा, डा गणेश कांत झा, प्रो चन्द्र शेखर झा बूढाभाई, दुर्गानन्द झा, आशीष चौधरी, पुरुषोत्तम वत्स, नवल किशोर झा, मणिभूषण राजू आदि रहथि।
