कांग्रेस महासचिव प्रियंका गांधी वाड्रा वायनाड लोकसभा उपचुनावक लेल बुधदिन अपन नामांकन पत्र दाखिल कयलनि। ओ पहिल बेर चुनाव लड़ि रहल छथि।
वायनाड लोकसभा सीटक उपचुनाव १३ नवम्बरकेँ होयत। एकरा देखैत कांग्रेस प्रियंका गाँधीकेँ एहिठामसँ मैदानमे उतारने अछि। ओ बुधदिन अपन नामांकन पत्रक तीन सेट दाखिल कयलनि।
एहि अवसर पर प्रियंकाक पति रॉबर्ट वाड्रा आ बेटा सेहो उपस्थित छलाह। एकर अतिरिक्त हुनकर माता आ कांग्रेसक पूर्व अध्यक्ष सोनिया गाँधी सेहो उपस्थित छलीह।
प्रियंकाक नामांकनक क्रममे अधिकारी लोकनि कहलनि जे नामाङ्कनक समय उम्मीदवारक सङ्ग मात्र पाँच गोटे उपस्थित रहि सकैत छथि। किछु समयक बाद प्रियंका गाँधीक पति आ हुनकर बेटा, कांग्रेस अध्यक्ष मल्लिकार्जुन खड़गे आ पार्टीक महासचिव केसी वेणुगोपाल कक्षसँ बाहर चलि गेलाह।
नामांकन पत्र दाखिल करबाक समय प्रियंका गाँधीक भाय आ लोकसभामे प्रतिपक्षक नेता राहुल गाँधी सेहो उपस्थित छलाह। ओ वायनाडक जिला कलेक्टर मेघश्रीक समक्ष अपन नामांकन पत्र दाखिल कयलनि।
