कांग्रेस महासचिव प्रियंका गांधी वाड्रा शुक्रदिन गाजामे निर्दोष लोकक हत्या पर चिन्ता व्यक्त कयलनि। ओ एकरा “अस्वीकार्य” कहलनि आ “दुनियाक प्रत्येक सरकार”सँ गाजामे इजरायलक सैन्य आक्रमणक निन्दा करबाक आग्रह कयलनि।
प्रियंका एक्स पर लिखलनि, “गाजामे भऽ रहल भयावह नरसंहारमे दिन-प्रतिदिन मारल जा रहल निर्दोष नागरिक, माता, पिता, डॉक्टर, नर्स, सहायता कार्यकर्ता, पत्रकार, शिक्षक, लेखक, कवि, वरिष्ठ नागरिक आ हजारो निर्दोष बच्चाक लेल मात्र बात करब पर्याप्त नहि अछि।”
ओ आगू लिखलनि, “ई प्रत्येक सही विचारक व्यक्तिक नैतिक जिम्मेदारी छैक (जाहिमे सभ इजरायली नागरिक सेहो शामिल छैक जे घृणा आ हिंसामे विश्वास नहिं करैत छैक) आ दुनियाक प्रत्येक सरकारक जिम्मेदारी छैक जे इजरायली सरकारक नरसंहारक निन्दा करय आ ओकरा रोकबाक लेल मजबूर करय।”
प्रियंका गाँधी इजरायलक प्रधानमंत्री बेंजामिन नेतन्याहू पर सेहो निशाना साधलनि। प्रधानमन्त्री बेंजामिन नेतन्याहू बुधदिन अमेरिकी कांग्रेसक संयुक्त सदनकेँ सम्बोधित कयलनि। एकर बाद दुनू सदनक सांसद ठाढ़ भऽ हुनका लेल ताली बजौलनि। सङ्गहि किछु नेता इजरायलक प्रधानमन्त्रीक भाषणकेँ ऐतिहासिक बतौलनि।
प्रियंका गाँधी कहलनि जे हुनकर काज एकटा एहन दुनियामे अस्वीकार्य अछि जे सभ्यता आ नैतिकताक दावा करैत अछि। ओ अमेरिकी नेतासभ पर कटाक्ष करैत कहलनि, जे मानवता आ सभ्यतामे विश्वास करैत छथि हुनका एहन नहिं करबाक चाही। गाजामे इजरायल द्वारा कयल गेल बर्बरताक समर्थन करैत पश्चिमी देशसभकेँ देखब शर्मक बात अछि।
ई पहिल बेर नहिं अछि जखन प्रियंका गाँधी वाड्रा गाजामे इजरायलक कारवाईक समर्थन करबाक लेल अंतर्राष्ट्रीय समुदायक आलोचना कयलनि अछि।
फरवरीमे प्रियंका गाँधी कहने छलीह जे न्याय, मानवता आ अंतर्राष्ट्रीय शालीनताक सभ मानदंड तोड़ि देल गेल अछि। ओ अंतर्राष्ट्रीय समुदायपर गाजामे भऽ रहल नरसंहारक प्रति आन्हर होयबाक आरोप लगओलनि।
