केरलक वायनाडसँ उपचुनावमे भारी जीतक बाद कांग्रेस नेता प्रियंका गाँधी वाड्रा बृहस्पतिकेँ लोकसभाक सांसदक रूपमे शपथ लेलनि। जहिना सदन शुरू भेल, ओ हाथमे संविधानक प्रति लऽ कऽ हिन्दीमे शपथ लेलनि।
५२ वर्षीय प्रियंका, जे अपन माय सोनिया गाँधी आ भाय राहुल गाँधीक सङ्ग संसद सदस्यक रूपमे सम्मिलित भेलीह, एकटा दुर्लभ उदाहरण अछि जाहिमे एक परिवारक तीनटा सदस्य एक सङ्ग संसदमे उपस्थित होइथ।
नांदेड़ उपचुनाव जीतनिहार कांग्रेसक रविन्द्र चव्हाण सेहो भगवानक नाम पर मराठीमे शपथ लेलनि। हालहिमे हुनक पिता वसंतराव चव्हाणक निधनक बाद उपचुनाव आवश्यक भऽ गेल छल।
प्रियंका गाँधी २०१९ मे सक्रिय राजनीतिमे प्रवेश कयलनि आ बादमे हुनका कांग्रेसक महासचिव नियुक्त कयल गेल। ओकर पाँच साल बाद प्रियंका गाँधी जनताक निर्वाचित प्रतिनिधिक रूपमे अपन यात्रा प्रारम्भ कयलनि।
ओ केरलक वायनाडसँ ४.१ लाखसँ बेसी मतक अन्तरसँ जीति प्राप्त कऽ अपन भाई राहुल गांधीकेँ सेहो पीछा छोड़ि देलनि।
प्रियंका गाँधीक संसदमे प्रवेश पार्टीक लेल कठिन समयमे भेल अछि, जकरा हरियाणा आ महाराष्ट्रमे चुनावी पराजयक झटका लागल अछि। ई देखब रोचक होयत जे की ओ एहि पुरान पार्टीकेँ प्रोत्साहन देबामे सक्षम होइत छथि आ ओकरा चुनावी पटरीपर फेरसँ आगू बढ़यबामे सहायता कऽ सकैत छथि।
चेहरा आ बजबाक शैलीमे समानताक कारणेँ हुनकर तुलना प्रायः दादी इन्दिरा गाँधीसँ कयल जाइत अछि। प्रियंका गाँधी सक्रिय राजनीतिमे प्रवेश कयलाक बादसँ पार्टीक एकटा प्रमुख प्रचारक छथि आ एहिसँ पहिने सेहो ओ अपन माय सोनिया गाँधी आ भाय राहुल गाँधीक लेल प्रचार कयने छलीह।
वायनाडक कांग्रेस नेता बुधदिन वायनाड संसदीय उपचुनावक चुनाव प्रमाणपत्र प्रियंका गाँधीकेँ सौंपलनि आ शुभकामना देलनि।
