प्रधानमन्त्री नरेंद्र मोदी आइ 22 मईकेँ बीकानेरक दौरा पर छथि। ई दौरा हालमे ऑपरेशन सिंदूरक बाद हुनकर पहिल राजस्थान दौरा अछि।
प्रधानमन्त्रीक ई दौरा धार्मिक, सामाजिक आ विकासात्मक दृष्टिकोणसँ बहुत महत्वपूर्ण मानल जा रहल अछि। प्रधानमन्त्री दिनकेँ करीब 10:30 बजे बीकानेर पहुँचला बाद देशनोक स्थित करणी माता मन्दिरमे दर्शन करताह। एकर बाद ओ पलाना गाममे एकटा जनसभाकेँ संबोधित करताह, जाहिमे बीकानेर संभाग केर विभिन्न जिला आ विधानसभा क्षेत्रक भाजपा कार्यकर्ता आ आम लोक शामिल होयत।
प्रधानमन्त्री देशनोक रेलवे स्टेशनक उद्घाटन करताह, जे अमृत भारत स्टेशन योजना केर अन्तर्गत आधुनिक सुविधासँ युक्त करणी माता मन्दिरक वास्तुकलासँ प्रेरित अछि। एकर संग ओ बीकानेर-मुंबई एक्सप्रेस ट्रेनकेँ सेहो हरियर झंडी देखताह आ देशभरिक 18 राज्य केर 103 पुनर्विकसित रेलवे स्टेशनक वर्चुअल उद्घाटन करताह।
प्रधानमंत्री बीकानेर, नावा, डीडवाना आ कुचामनमे सौर ऊर्जा परियोजनाक उद्घाटन करताह। संगहि पॉवर ग्रिड ट्रांसमिशन सिस्टम आ फतेहगढ़-II पॉवर स्टेशनक विस्तार काजक सेहो शुभारंभ करताह, जाहिसँ स्वच्छ ऊर्जाक आपूर्ति आ कार्बन उत्सर्जनमे कमी आयत।
एकर संगहि चूरू-सादुलपुर रेल लाइनक आधारशिलाक संग प्रधानमंत्री कूल छह रेलवे लाइनक विद्युतीकरण राष्ट्रकेँ समर्पित करताह। एहिमे फलौदी, सूरतगढ़, फुलेरा, उदयपुर, जैसलमेर आ बाड़मेरक परियोजनासभ शामिल अछि।
प्रधानमंत्री राजस्थानमे तीन वाहन अंडरपास आ सात नव सड़क परियोजनाक आधारशिला रखताह, जकर कुल लागत 4850 करोड़ रूपयासँ अधिक अछि। एहिकेँ अलावा ओ 3240 करोड़ रूपैयासँ अधिकक लागत वला 750 किलोमीटर लंबा राज्य राजमार्गक उन्नयन काजक सेहो शिलान्यास करताह। प्रधानमंत्री राज्यक राजसमंद, प्रतापगढ़, भीलवाड़ा आओर धौलपुरमे नव नर्सिंग कॉलेजक उद्घाटन करताह। ताहि संग झुंझुनू जिलाक ग्रामीण जलापूर्ति परियोजना आओर पाली जिलाक सात शहरक शहरी जलापूर्ति योजनाक शिलान्यास करताह। प्रधानमंत्री केर ई दौरा राजस्थानक बुनियादी ढांचा, रेलवे, सड़क, बिजली, स्वास्थ्य आओर जल आपूर्ति क्षेत्रमे व्यापक विकासक दिशामे एकटा महत्वपूर्ण कदम मानल जा रहल अछि।
