बिहारक दोसर एम्स दरभंगामे बनय जा रहल अछि। बहुत दिनक बाद अंततः दरभंगा एम्स लेल जमीनक चयन कयल गेल आ आब अगिला मास प्रधानमंत्री मोदी दरभंगा एम्स केर आधारशिला रखताह। दरभंगा एम्सक निर्माण लेल, दिल्लीसँ सहयोग लेल जा रहल अछि। ई जानकारी दैत केन्द्रीय स्वास्थ्य मंत्री जेपी नड्डा कहलनि जे निचला भूमि क्षेत्रमे भवन निर्माणक चुनौती अछि। एकरा देखैत केंद्र सरकार दरभंगा एम्सक निर्माणमे तकनीकी सहायता लेल आईआईटी दिल्लीसँ सहयोग मांगने अछि।
केन्द्रीय स्वास्थ्य मंत्री आगा कहलनि जे दरभंगामे राज्य सरकारक देल गेल जमीन एम्सक निर्माणक लेल उपयुक्त अछि। हम सभ जनैत छी जे दरभंगा शहर निच भूमिमे अछि। पहिने राज्य सरकार शहरक भीतर जमीन दैत छल, मुदा बादमे एम्स लेल ग्रीन फील्डक मांग भेल, तखनि राज्य सरकार शहरक बाहर जमीन देलक अछि। केन्द्रीय स्वास्थ्य मंत्री कहलनि जे ओ स्वयं हालहिमे दरभंगा गेलाह आ ओ जमीन देखलनि आ आब भवनक निर्माण जल्दिये शुरू होयत।
केन्द्रीय स्वास्थ्य मंत्री नड्डा कहलनि जे दरभंगा एम्सक निर्माण जल्दीये पूरा भऽ जायत। निचला भूमि क्षेत्र होयबाक कारणेँ हम आईआईटी दिल्लीसँ तकनीकी सहायता मँगने छी। राज्य सरकार सेहो कहलक अछि जे ओ जमीन भरबाक लेल तैयार अछि। जेपी नड्डा कहलनि जे एहि सब बात के ध्यानमे राखि दरभंगा एम्सक भवन तैयार होएत। नड्डा कहलनि जे आओर देरीक कोनो गुंजाइश नहिं अछि। प्रधानमंत्री नरेन्द्र मोदी अगिला मास दरभंगा एम्स केर आधारशिला रखताह। नड्डा आधारशिला रखबाक तिथि निर्दिष्ट नहिं कयलनि, मुदा एहि परियोजनाक प्रतीक्षा करयवलाक लेल दरभंगा एम्स बनयबाक उम्मीद आब वास्तविक बनय जा रहल अछि।
