प्रधानमंत्री मोदी कहलनि जे दरभंगा एम्सक स्थापनासँ स्थानीय स्तर पर रोजगार आ स्वरोजगारक बहुत रास अवसर उत्पन्न होयत। मिथिलाक लोककेँ आब बहुत दूर जा कए इलाज नहिं करबय पड़त। एहि दौरान ओ बिहारकेँ लगभग १२,१०० करोड़ टाकाक अन्य विकास परियोजना सेहो उपहारमे देलनि। एहिमे स्वास्थ्य सुविधाक सङ्ग-सङ्ग रेल आ सड़क सम्पर्कक योजना सेहो सम्मिलित अछि।
प्रधानमंत्री नरेन्द्र मोदी बुधकेँ बिहारक दरभंगामे कतेको विकास परियोजनाक लोकार्पण आ शिलान्यास कयलनि। प्रधानमंत्री मोदी दरभंगा एम्सक शिलान्यास कयलनि संगहि संग भागलपुरमे १२६० करोड़ टाकाक लागतसँ एम्स केर आधारशिला सेहो रखलनि। ओ कहलनि जे हमर सरकार मुख्य रूपसँ स्वास्थ्य क्षेत्रमे पाँचटा फोकस पर काज कऽ रहल अछि। प्रधानमंत्री कहलनि जे हमर सरकारक मिशन गरीबसँ गरीबकेँ नीक स्वास्थ्य सुविधा प्रदान करब अछि। ओ कहलनि जे दरभंगा एम्स बिहारक स्वास्थ्य क्षेत्रमे पैघ बदलाव अनत।
प्रधानमंत्री मोदी कहलनि, देशवासीकेँ नीक स्वास्थ्य सुविधा प्रदान करब आ हुनक जीवन आसान बनेनाइ हमर सबसँ पैघ प्राथमिकता अछि। दरभंगा एम्स पश्चिम बंगाल आ ओकर लगपासक क्षेत्रक कतेको क्षेत्रक अतिरिक्त मिथिला, कोसी आ तिरहुत क्षेत्रक लोककेँ स्वास्थ्य सुविधा प्रदान करत। पड़ोसी नेपालसँ आबयवला रोगी सेहो एहि अस्पतालमे उपचार पाबि सकैत छथि।
सरकार गरीबक लेल ५ फोकस पर काज कए रहल अछि।
प्रधानमंत्री मोदी कहलनि जे हमर सरकार देशमे स्वास्थ्यक प्रति समग्र दृष्टिकोणक संग काज कऽ रहल अछि। हमर पहिल ध्यान रोगक रोकथाम पर अछि। दोसर ध्यान रोगक समुचित जाँच पर अछि, तेसर ध्यान लोककेँ मुफ्त आ किफायती उपचार प्रदान करब अछि, हुनका सस्ता दवाइ भेटबाक चाही, चारिम ध्यान छोट शहरमे सर्वोत्तम उपचार सुविधा प्रदान करब, देशमे डॉक्टरक कमीकेँ दूर करब आ पाँचम ध्यान स्वास्थ्य सेवामे प्रौद्योगिकीक विस्तार करब अछि।
प्रधानमंत्री मोदी कहलनि जे आयुष्मान भारत योजना देशक गरीबक जीवनमे पैघ बदलाव आनि रहल अछि। देशमे एहि योजनाक अन्तर्गत लगभग चारि करोड़ लोकक इलाज भऽ चुकल अछि। जँ आयुष्मान भारत योजना नहि होइत तँ एहिमेसँ अधिकांश लोककेँ अस्पतालमे भर्ती नहिं कयल जाइत। करोड़ो परिवार आयुष्मान योजनासँ लगभग सवा लाख करोड़ टाकाक बचत कयलक अछि।
प्रधानमंत्री मोदी एहि अवधिमे अपन संबोधनमे बिहार कोकिला शारदा सिन्हाकेँ सेहो श्रद्धांजलि देलनि। ओ कहलनि, “हम मिथिलाक धरतीक बेटी स्वर कोकिला शारदा सिन्हाकेँ अपन श्रद्धांजलि अर्पित करैत छी। भोजपुरी आ मैथिली संगीतक प्रति शारदा सिन्हाक सेवा अतुलनीय अछि। जाहि तरहें ओ अपन गीतसँ महापर्व छठिक महिमाकेँ सम्पूर्ण विश्वमे पसारलनि से अद्भुत अछि।
