आम आदमी पार्टी (आप) सरकारमे मंत्री आतिशी दावा कयलनि जे मोदी सरकार दिल्लीमे राष्ट्रपति शासन लगयबाक तैयारी कऽ रहल अछि। ओ कहलनि जे हुनक विश्वसनीय सूत्र बतौलक अछि जे दिल्लीमे निर्वाचित सरकारक विरुद्ध षड्यंत्र चलि रहल अछि। दिल्ली सरकारक अधिकारी मिटिंगमे नहिं आबि रहल छथि। मंत्री आतिशी कहलनि जे ई दिल्लीक जनताक संग विश्वासघात होयत।
आतिशी एकटा प्रेस कॉन्फ्रेंसक माध्यमसँ कहलनि अछि जे २० साल पहिलुक मामिलामे विभव कुमार पर कारवाई भेल। दिल्लीमे अधिकारीसभक स्थानान्तरण आ तैनाती नहिं भऽ रहल अछि। अरविन्द केजरीवालकेँ झूठ आरोपमे गिरफ्तार कयल गेल अछि। ईडी बिना कोनो सबूतक मुख्यमंत्रीकेँ गिरफ्तार कयलक अछि, किएक तँ भाजपा जनैत अछि जे ओ कतबो जोर लगा लिअ अरविन्द केजरीवालकेँ पराजित नहिं कऽ सकैत अछि।
आतिशी कहलनि “अरविंद केजरीवालक सरकारक खिलाफ एकटा पैघ राजनीतिक षड्यंत्र तैयार कयल जा रहल अछि। आबयवला किछु दिनमे भाजपा शासित केन्द्र सरकार दिल्लीमे राष्ट्रपति शासन लागू करय जा रहल अछि। पछिला कतेको दिनसँ दिल्लीमे कोनो अधिकारी तैनात नहिं कयरल जा रहल अछि। दिल्लीमे कतेको विभाग खाली अछि। एलजी साहब पिछला एक सप्ताहसँ दिल्ली सरकारक खिलाफ बिना कोनो कारणक गृह मंत्रालयकेँ चिट्ठी लिखि रहल छथि। २० साल पुरान मामिला उठाओल गेल आ दिल्लीक मुख्यमंत्रीक सचिवकेँ बर्खास्त कऽ देल गेल। एहि सबसँ पता चलैत अछि जे दिल्लीमे राष्ट्रपति शासन लगयबाक षड्यंत्र चलि रहल अछि।
आतिशी कहलनि, “भाजपा जनैत अछि जे ओ कतेको प्रयास करथि, ओ दिल्लीमे अरविंद केजरीवालकेँ नहिं हरा सकैत छथि। दिल्लीक लोक अरविंद केजरीवालसँ प्रेम करैत अछि आ दिल्लीमे आम आदमी पार्टीकेँ वोट भेटैत अछि। ओ (भाजपा) दिल्लीमे चुनाव नहिं जीतय जा रहल अछि, तेँ ओ दिल्लीक निर्वाचित सरकारकेँ गिराबयक षड्यंत्र कऽ रहल अछि।”
आगू ओ कहलनि “अरविंद केजरीवालकेँ बिना कोनो सबूतक फर्जी मामिलामे गिरफ्तार कएल गेल अछि। ई दिल्लीक निर्वाचित सरकारकेँ गिराबय केर साजिश अछि। अरविन्द केजरीवाल जे वादा कयलनि कि दिल्लीक महिलाकेँ प्रति माह १००० टाका देताह, एकरा रोकय केर साजिश राजनीतिक प्रतिद्वंद्वी द्वारा कयल जा रहल अछि।
