राष्ट्रपति पुतिनक जल्दिये भारत यात्रा, दुनु देशक संबंध आओर होयत मजबूत

नई दिल्ली
*

रूसक राष्ट्रपति व्लादिमीर पुतिन एहि महीनाक अंतमे भारतक दौरा कय सकैत छथि। ई जानकारी रूसी मीडिया द्वारा देल॑ गेल अछि, जाहिमे राष्ट्रीय सुरक्षा सलाहकार (एनएसए) अजीत डोवालक रूस यात्राक दौरान देल गेल बयानक हवालासँ देने अछि।

मास्कोमे रूसी सुरक्षा परिषदक सचिव सर्गेई शोइगुसँ भेंट करैत डोवाल कहलनि कि हम आब आर बहुत नीक संबंध स्थापित कय लेने छी, जकरा हम बहुत महत्व दैत छी। ई एकटा रणनीतिक साझेदारी अछि। हम उच्च स्तर पर संवाद कय रहल छी।

एहिसँ पहिने क्रेमलिनक सहायक यूरी उशाकोव सेहो एहि बातक पुष्टि कयने छलाह जे राष्ट्रपति पुतिन प्रधानमंत्री नरेंद्र मोदीक आमंत्रण पर भारत आबि रहल छथि।

ओ कहलनि जे, ई वार्षिक द्विपक्षीय शिखर सम्मेलनक परंपराक तहत भऽ रहल अछि। ओ कहलनि जे, “हमर नेता सबहक बीच हर साल भेंट करबाक समझौता अछि। एहि बेर हमर सबहक बारी अछि।” ध्यान देबय वला बात अछि कि राष्ट्रपति पुतिन आखिरी बेर ६ दिसंबर २०२१ केँ भारतक दौरा कयलनि, जखनि नई दिल्लीमे २१म भारत-रूस वार्षिक शिखर सम्मेलनक आयोजन कयल गेल छल।

एकर संग पिछला साल प्रधानमंत्री मोदी दू बेर रूसक दौरा कयलनि। पहिल जुलाईमे भारत-रूस केर २२म शिखर सम्मेलनमे भाग आ दोसर अक्टूबरमे कजानमे आयोजित ब्रिक्स शिखर सम्मेलनमे भाग लेलनि।

रूसक विदेश मंत्री सर्गेई लावरोव मार्चमे आयोजित सम्मेलन ‘रूस आ भारत द्विपक्षीय संबंध लेल नव एजेंडा’मे सेहो पुतिन केर भारत यात्राक पुष्टि करैत कहलनि कि “भारत आ रूसक बीच राजनीतिक संवाद तेजीसँ विकसित भऽ रहल अछि। एहीमे हमर नेताक बहुत पैघ योगदान अछि। आब राष्ट्रपति पुतिन केर भारत यात्राक तैयारी जारी अछि।”

ओ ईहो कहलनि कि “हमर देशक बीच संबंध समयक कसौटी पर खरा उतरल अछि आओर आई सेहो आपसी सम्मान आ एक-दोसराक हितकेँ ध्यानमे रखैत समानता पर आधारित सहयोग जारी अछि।”

क्रेमलिन द्वारा जारी बयानमे कहल गेल अछि कि “रूस आ भारतीय संबंध सामरिक प्रकृतिक अछि आ ई कोनो बाहरी प्रभावसँ प्रभावित नहिं अछि। ई सब क्षेत्रमे गतिशील रूपसँ विकसित भऽ रहल अछि।”

प्रधानमंत्री मोदी सेहो एहि दौरान पुतिनक भारतक दौरा लेल आमंत्रित कयलनि, जकरा राष्ट्रपति पुतिन खुशी-खुशी स्वीकार कय लेलनि। मुदा राष्ट्रपति पुतिनक आमंत्रणक बावजूद प्रधानमंत्री मोदी रूसमे आयोजित विजय दिवस समारोहमे शामिल नहिं भऽ सकल छलाह।