बाबाजी कुटी बनगाँव स्थित खियाली खाँ बंगला पर कलावती उच्च विद्यालय बनगाँव केर अवकाश प्राप्त प्रधानाध्यापक विश्वनाथ खाँक अध्यक्षतामे आयोजित शोक सभामे राष्ट्रपति पुरस्कारसौं सम्मानित संस्कृत विद्यालयक अवकाश प्राप्त प्रधानाध्यापक पं. रघुवंश झाकें बनगाँव वासी सभक द्वारा विनम्र श्रद्धांजलि अर्पित कएल गेल।
एहि अवसर पर उपस्थित सभाक अध्यक्ष सहित पं. हरिश्चंद्र मिश्र, शशिधर ठाकुर, डॉ. विनय कर्ण, अरविन्द खाँ, शिवशंकर खाँ, बाबाजीक भजनी बैद्यनाथ खाँ, भाजपा नेतृ लाजवन्ती झा, कैलाश चंद्र खाँ, शिशिर कुमार झा, रोशन कुमार झा, शम्भूनाथ खाँ, भगवान मिश्र, मालिक खाँ, रविन्द्र चौधरी, डॉ. गणेश ‘जनगण’ एवं अन्य गणमान्य लोक सभ पं. रघुवंश झा’क विद्वता, समाज सेवा एवं हुनक अन्य महत्वपूर्ण कृतित्व सभक स्मरण करैत अपन श्रद्धा सुमन अर्पित केलैथ ।
उल्लेख्य अछि जे पं. रघु बाबू संस्कृतनिष्ठ शिक्षा एवं परिवार – समाजक नवतुरिया सभमे शिष्टाचार, नैतिकता आओर नीक संस्कारक प्रसारक प्रोत्साहक आ प्रबल समर्थक छलाह। हिनक मृत्युसौं बनगाँव वासी एवं आसपासक अनेक गाममे लोक सभ शोकाकुल भऽ गेल छथि।
बनगाँव बुद्धिजीवी विचार मंचक तत्वावधानमे आयोजित एहि शोकसभाक अंतमे पंडित जीक फोटो पर पुष्पांजलि अर्पित कयल गेल एवं हुनक आत्माक शान्ति हेतु दू मिनटक मौन राखल गेल।
