प्रशांत किशोर कहलनि जे बिहारक लोक जे फैक्ट्रीमे काज कऽ सकैत छथि ओ फैक्ट्री लगवा सेहो सकैत छथि। हम बिहारकेँ सुधारने बिना मानयवाला नहिं।
चुनाव रणनीतिकार आ जन सुराजक सूत्रधार प्रशांत किशोर विधानसभा चुनावमे गठबंधन करबाक नाम पर प्रहार कयलनि अछि। मंगल दिन (२५ जून) एकटा बयान जारी करैत पीके कहलनि जे कोनो माईक लालमे एतेक शक्ति नहिं अछि जे प्रशांत किशोरकेँ पाइ केर लालच दऽ कऽ खरीद सकय।
आगू, प्रशांत किशोर २०२५क विधानसभा चुनावमे मुख्यमंत्रीक पद पर सेहो रुख स्पष्ट कयलनि। प्रशांत किशोर एकटा जनसभाक दौरान कहलनि जे कतेको लोक सवाल करैत छथि जे ई भाइ सभ एतेक मेहनत किएक कऽ रहल छथि। ओ वोट नहिं मांगि रहल छथि। हमरासभसँ किछु लेबो नहिं कयलनि, तखन एतेक मेहनत किएक कए रहल छथि ? पीके कहलनि जे किछु लोक इहो कहैत छथि जे ओ मुख्यमंत्री बनबाक लेल बिहार आयल छथि, ताहि लेल ओ एतेक मेहनत कए रहल छथि। हम एहन लोक सभसँ कहय चाहैत छी जे अहाँ हमरा नहिं जनैत छी, हम सभ एतेक छोट सपना लऽ कऽ जन्म नहिं लेलहुं अछी।
प्रशांत किशोर आगू कहलनि, “ई सपना लऽ कऽ आयल छी जे अपन जीवनकालमे बिहारकेँ विकसित राज्यक श्रेणीमे देखी। अपन जीवनकालमे हम देखय चाहैत छी जे गुजरात, महाराष्ट्र, हरियाणा, तमिलनाडु आ पंजाब सहित पूरा भारतक लोक रोजगार लेल बिहार आबि जाय आ तखन हमसभ विश्वास करब जे बिहारमे विकास भऽ रहल अछि।”
आगू कहलनि, “हम बिहारक लोक मजदूर बनबाक लेल जन्म नहिं लेलहुं अछि। बिहारक लोक मजदूर सप्लायर नहिं बनि सकैत छथि। जकरा आइ देशमे मजदूरक जरूरत अछि ओ कहैत छथि जे जाउ आ बिहारसँ मजदूर आनू। बिहारक लोक जे कारखानामे काज कऽ सकैत छथि ओ कारखाना सेहो लगा सकैत छथि।”
लोकसभकेँ आश्वस्त करैत पीके इहो कहलनि जे हमरापर विश्वास करू, कोनो पार्टी, कोनो धर्म आ जातिक लोक हमरा कीनि नहि सकैत अछि। चाहे ओकरा लग कतेक पाइ होइ। हमरा केओ डरा नहिं सकैत अछि, हम डरए बला नहिं छी। देशमे कोनो माईक लाल नहिं अछि जे हमरा खरीद सकय। हम बिहारकेँ बिना सुधारने मानयवाला नहिं छी।
