मिथिला क्षेत्रीय बिहारक मधुबनी जिलामे रविकेँ चारि संगतुरिया पूजाक लेल पोखरिसँ जल आनय गेल छल आ पोखरिमे डूबय लागल। ओतय हल्ला होबय लागल, हल्ला सुनि लोकसभ दौड़ल आ सभकेँ बचयबाक प्रयास कयलनि। तीनटा बच्चीकेँ बचा लेल गेल, मुदा एकटाक मृत्यु भऽ गेल। बच्चीक मृत्युक बाद परिवारमे हाहाकार मचि गेल। मृतक बच्चियाक पहिचान १२ वर्षक रानी कुमारीक रूपमे भेल अछि।
बचायल गेल तीनू बालिकाकेँ इलाजक लेल स्थानीय अस्पतालमे भर्ती कयल गेल अछि, जतय सभ खतरासँ बाहर कहल जा रहल अछि। स्थानीय निवासी ब्रह्मदेव यादवक अनुसार ई घटना फुलपरास थाना क्षेत्रक बरियारी गामक अछि। मृतक बालिकाक पहिचान लक्षण मण्डलक बेटी १२ वर्षक रानी कुमारीक रूपमे भेल अछि। कहल जाइत अछि जे रविदिन भोरमे रानी कुमारी अपन तीनटा आन सखीक सङ्ग गामक पोखरिमे पूजाक लेल पानि अनबाक लेल गेल छलीह। पोखरिमे पानि बेसी भरल छल। रानी सहित चारिटा बच्चीक जल भरैत काल पैर पिछरि गेल, जकर बाद पोखरि आ आसपास उपस्थित लोक सभ डूबय केर बातक हल्ला करय लगलथि, से सुनि ओतय जमा भेल गामक लोक कोनो तरहेँ तीन टा बच्चीकेँ बचा लेलक। ओतहि पानिमे डूबलासँ रानीक मौकापर मृत्यु भऽ गेल।
बचायल गेल तीनू बच्चाकेँ स्थानीय अस्पतालमे भर्ती कयल गेल अछि, जतय सभट खतरासँ बाहर अछि। सूचना भेटलाक बाद पुलिस घटनास्थल पर पहुँचल आ शवकेँ कब्जामे लेलक आ पोस्टमॉर्टमक लेल सदर अस्पताल भेजि देलक आ पुलिस जांच शुरू कऽ देलक अछि। एहि घटनाक बाद गाममे शोक पसरल अछि।
