देशक यशस्वी प्रधानमंत्री नरेंद्र मोदी नव भारतक आधुनिक विश्वकर्मा छथि । हिनकर सोच आ नीति भाजपा कार्यकर्ता सभ लेल एकटख आदर्श अछि। पीएम मोदी आ एनडीए सरकारक उपलब्धि सभकेँ सभ बूथ पर पहुंचेबाक लेल पार्टी कार्यकर्ता सभक ईमानदारीसँ अपन दायित्वक निर्वहन करबाक चाही। उपरोक्त बात दरभंगा सांसद सह लोकसभामे भाजपा सचेतक डाॅ० गोपाल जी ठाकुर बेनीपुर पूर्वी जिलाक पूर्वी मंडलक कार्यसमितिक बैसार केर संबोधित करैत कहलनि।
पूर्वी मंडलक मकरमपुर अवस्थित महिला मोर्चाक नेत्री निभा देवीक आवासीय परिसरमे मंडल अध्यक्ष राजनीश सुंदरम केर अध्यक्षतामे आयोजित कार्यसमितिक बैसारमे सांसद डाॅ० ठाकुरक संग-संग जिला अध्यक्ष विनय कुमार पासवान , जिला महामंत्री संजय कुमार सिंह उर्फ पप्पू सिंह सेहो विशेष रूपसँ उपस्थित रहलाह।
बैसारमे मंडल भाजपाक कार्यकर्ता सभ द्वारा सांसद डाॅ० ठाकुर सहित अन्यान्य अतिथि सभकेँ पाग आ अंगवस्त्रसँ सम्मानित कयल गेल । सांसद डाॅ० ठाकुर केंद्र सरकारक उपलब्धि आ जनकल्याणकारी योजना सभकेँ लऽ कऽ बूथ स्तर पर पहुंचबाक आह्वान करैत कहलनि जे संगठनकेँ धारदार बनेबाक लेल एहि तरहक पहल आवश्यक अछि ।
जिला अध्यक्ष विनय कुमार पासवान बूथक मजबूती लेल पार्टी संगठनसँ महिला आ वंचित समाजकेँ जोड़बा पर जोर दैत कहलनि जे केन्द्रीय नेतृत्वक लक्ष्य केर पूरा करब आवश्यक अछि। जिला महामंत्री संजय कुमार सिंह उर्फ पप्पू सिंह बूथ सशक्तिकरण पर जोर दैत कहलनि जे केंद्र सरकारक जतेक योजना साकार भऽ रहल अछि, ओकरा सबहक बारेमे लोक सभकेँ बतेनाई आवश्यक अछि।
बैसारमे अमित झा उर्फ पप्पू , राहुल कर्ण , संजय मिश्रा , रंजीत ठाकुर , श्याम ठाकुर , अजय झा , निखिलेश चौधरी , राहुल झा , अनिल झा , अरुण राम , इंद्रेश झा , मुनींद्र यादव , अमित झा , भगवान पाठक , अमरनाथ मिश्र उर्फ अटल जी , दिनेश चौधरी , बिपिन झा , संजय ठाकुर , नटवर , मदन महतो , प्रदीप झा , जटाशंकर झा सहित अनेको भाजपा समर्थक मौजूद छलाह।
