सातम चरणक मतदानसँ पहिने प्रधानमंत्री नरेन्द्र मोदी तमिलनाडुक कन्याकुमारीमे प्रसिद्ध विवेकानन्द रॉक मेमोरियलमे ध्यान करताह। ओ ३० मईकेँ एतय आबि पूरा दिन-राति एतय बितेताह। पीएम मोदीक आगमनसँ पहिने एतय सुरक्षा सहित आन व्यवस्था पर ध्यान देल जा रहल अछि। हुनकर सुरक्षाक लेल २००० पुलिसकर्मीक सङ्ग कतेको सुरक्षा एजेंसीकेँ तैनात कयल गेल अछि। मानल जाइत अछि जे विवेकानन्दकेँ एतय ‘भारत माता’क विषयमे दिव्य दृष्टि प्राप्त भेल छल। प्रधानमंत्री २०१९क चुनाव अभियानक बाद केदारनाथ गुफा मन्दिरमे एहने ध्यान कयने छलाह।
प्रधानमंत्री मोदी विवेकानंद रॉक मेमोरियलमे ४५ घंटा रहताह।
भाजपा नेता लोकनि कहलनि जे मोदी ३० मईक साँझसँ १ जूनक साँझ धरि ध्यान मंडपममे ध्यान करताह। पीएम मोदीक यात्रासँ पहिने एतय सुरक्षा बढ़ा देल गेल अछि। तिरुनेलवेली रेंजक डीआईजी प्रवेश कुमार पुलिस अधीक्षक ई. सुंदरवथनमक संग रॉक मेमोरियल, बोट जेटी, हेलीपैड आ राज्य अतिथि गृहमे सुरक्षा व्यवस्थाक निरीक्षण कयलनि। प्रधानमंत्री मोदीक कोर सुरक्षा टीम सेहो कार्यक्रम स्थल पर पहुँचि गेल अछि।
प्रधानमंत्री मोदीक ३० मईकेँ दुपहरियाक बाद कन्याकुमारी पहुंचय केर उम्मीद अछि। तकर बाद ओ स्मारकक लेल प्रस्थान करताह। ओ १ जूनकेँ दुपहरिया ३ बजे धरि विवेकानन्द रॉक मेमोरियलमे रहताह। प्रधानमंत्री मोदी एतय ४५ घंटा धरि रहताह, तटीय सुरक्षा समूह, भारतीय तटरक्षक बल आ भारतीय नौसेना समुद्री सीमा पर चौकसी राखत।
भाजपाक एकटा नेता कहलनि जे ओही ठाम ध्यान करब स्वामीजीक विकसित भारतक दृष्टिकोणकेँ जीवंत करबाक लेल प्रधानमंत्री मोदीक प्रतिबद्धताकेँ दर्शाबैत अछि। ई स्थान पवित्र ग्रन्थसभमे भगवान शिवक लेल देवी पार्वतीक ध्यानक स्थानक रूपमे सेहो जानल जाइत अछि। ई स्थान भारतक सबसँ दक्षिणी छोर अछि। प्रधानमंत्री तेसर बेर सत्तामे आबय केर दावा कय चुकल छथि। १ मई लोकसभा चुनावक सातम आ अंतिम चरण अछि।
भाजपा नेतालोकनि कहलनि जे एहिठाम पूर्वी आ पश्चिमी तटीय क्षेत्र मिलैत अछि। ई हिन्द महासागर, बंगालक खाड़ी आ अरब सागरक मिलन स्थल सेहो अछि। एकटा नेता कहलनि प्रधानमंत्री कन्याकुमारी जा कय राष्ट्रीय एकताक संदेश दऽ रहल छथि। ई तमिलनाडुक प्रति हुनक गहींर प्रतिबद्धता आ स्नेहकेँ सेहो दर्शाबैत अछि।
