कांग्रेस सांसद शशि थरूर सोमदिन प्रधानमंत्री नरेंद्र मोदीक वैश्विक मंच पर भूमिकाक प्रशंसा करैत कहलनि जे हुनकर ऊर्जा, सक्रियता आ संवाद करबाक इच्छाशक्ति भारत लेल एकटा पैघ पूंजी अछि। हालांकि शशि थरूरक ई टिप्पणी कांग्रेस पार्टीक आधिकारिक लाइनसँ मेल नहिं खा रहल अछी, जे लगातार मोदी सरकारक विदेश नीतिक आलोचना करैत रहैत अछि।
कांग्रेस नेताक ई लेख एकटा अखबारमे छपल, जाहिमे ओ हाल केर ‘ऑपरेशन सिंदूर’क बाद भारतक कूटनीतिक पहलक ‘राष्ट्रीय संकल्प आ प्रभावी संचार’क उदाहरण बतेलनि।
शशि थरूर अपन लेखमे लिखलनि, ‘प्रधानमंत्री मोदी केर ऊर्जा, सक्रियता आ वैश्विक स्तर पर संवाद करय केर तत्परता भारतक एकटा पैघ ताकत अछि, जाहिसँ बेसी समर्थन भेटैत अछि।’ ओ कहलनि कि २२ अप्रैलक पहलगाम आतंकी हमलाक बाद भारतक कूटनीतिक सक्रियता आ एकर जवाबमे शुरू कयल गेल ‘ऑपरेशन सिन्दूर’ अंतरराष्ट्रीय स्तर पर भारतक स्थितिकेँ मजबूत कयलक।
कांग्रेस नेता थरूर कहलनि, कि ओ सात सदस्यीय बहुदलीय प्रतिनिधिमंडलक नेतृत्व कयलनि जे अमेरिका सहित गुयाना, पनामा, कोलंबिया आ ब्राजील देशक दौरा कयलक। एहि सब यात्राक उद्देश्य दुनियाकेँ एहि बात पर विश्वास दियेबाक छल कि भारतक हमला आतंकवादक खिलाफ आत्मरक्षाक डेग अछि आ ई कोनो राष्ट्रक खिलाफ युद्ध नहि छल। ओ कहलनि, ‘हमर एकतासँ दुनियाकेँ एकटा मजबूत संदेश भेटल कि भारत आतंकवादक मुद्दा पर एक आवाजमे बाजैत अछि, चाहे आंतरिक राजनीतिमे कतबो मतभेद होय।’
शशि थरूर दावा कयलनि, भारतक कूटनीतिक सफलता एही बातसँ साबित भऽ गेल कि कोलंबिया अपन पहिल बयान (जाहिमे पाकिस्तानमे नागरिकक मौत पर शोक व्यक्त कयल गेल छल) वापस लऽ लेलक आ भारतकेँ आत्मरक्षाक अधिकारक समर्थन कयलक। ओ कहलनि, अमेरिकामे सेहो भारतीय पक्षकेँ सहानुभूति भेटल, जखनकि पाकिस्तानी प्रतिनिधिमंडल सेहो ओतय मौजूद छल। अमेरिकी अधिकारी भारतक एहि विचारक समर्थन कयलक कि लश्कर-ए-तैयबा आ जैश-ए-मोहम्मद जेहन आतंकी संगठनक खिलाफ ठोस कार्यवाही होयबाक चाहि।
शशि थरूरक ई बात ऐहन समयमे आयल जखनि कांग्रेस पार्टी मोदी सरकारक विदेश नीति खास कय अमेरिकी राष्ट्रपति डोनाल्ड ट्रंपक भारत-पाकिस्तान युद्धविरामक मध्यस्थताक दावाक आलोचना कय रहल अछि।
