कजाकिस्तानसँ रूस जा रहल एकटा यात्री विमान ११० यात्रीकेँ लऽ कऽ देशक अक्ताऊ शहरक हवाइ अड्डाक लग दुर्घटनाग्रस्त भऽ गेल अछि। ई जानकारी कजाकिस्तानक आपातकालीन मंत्रालय देलक अछि। स्थानीय मीडियक कहब छनि जे दुर्घटनाक कारण विमानमे आगि लागि गेल।
मंत्रालय कहलक, “कजाख आपातकालीन मंत्रालयक कुल ५२ बचाव आ राहत दल आ ११ उपकरण दल बचाव कार्य करबाक लेल घटनास्थल पर पठाओल गेल अछि। जखन ई दल घटनास्थल पर पहुँचल तखन विमान आगिमे घिरल भेटल। अग्निशमन दलक कर्मी एखनि आगि बुझाबयमे लागल छथि। किछु लोककेँ जीवित रहबाक संभावना अछि।”
प्रारंभिक रिपोर्टसँ पता चलैत अछि जे विमानमे १०५ यात्री आ चालक दलक ५ सदस्य छलाह। यद्यपि मृतकक सटीक संख्या एखन धरि स्पष्ट नहि अछि, मुदा २५ लोकक जीवित रहबाक सूचना अछि, जाहिमेसँ २२ गोटे अस्पतालमे भर्ती छथि।
बचाव कार्य चलि रहल अछि आ पीड़ितक विवरणक पुष्टि कयल जा रहल अछि।
अजरबैजान एयरलाइंसक एम्ब्रेयर ईआरजे-१९० विमान बाकू अज़रबैजानसँ रूसक चेचन्याक ग्रोजनी जा रहल छल। घना कुहेसक कारण एकरा अक्ताऊ दिस मोड़ि देल गेल छल।
विमान दुर्घटना स्थानीय समयानुसार भोर ६:२८ बजे भेल छल।
विमान हवाई अड्डासँ किछु किलोमीटर दूर दुर्घटनाग्रस्त भऽ गेल।
फ्लाइट रडार२४क अनुसार, विमानकेँ “मजबूत जीपीएस जैमिंगक सम्पर्कमे आबि गेल छल, जाहिसँ विमानकेँ खराब एडीए-बी डेटा भेजि रहल छल।
एजेंसीसभ दुर्घटनाक कारणक पता लगाबय लेल जाँच शुरू कऽ देलक अछि।
सोशल मीडिया पर प्रसारित अपुष्ट वीडियोमे विमान दुर्घटनाग्रस्त होइत देखल गेल। वीडियोमे लपट उठि रहल अछि आ आकाशमे घना कारी धुआँ उठि रहल अछि।
कजाकिस्तान आपातकालीन मंत्रालयक कमांड सेंटरमे एकटा परिचालन मुख्यालय स्थापित कयल गेल अछि, जाहिमे पूछताछक लेल एकटा हॉटलाइन देल गेल अछि।
