तिरुपति लड्डूमे पशु वसाक कथित उपयोगक विशेष जाँच दल (एसआईटी)क जाँचक माँग करैत सर्वोच्च न्यायालयमे एकटा जनहित याचिका (पीआईएल) दायर कयल गेल अछि।
हिन्दू सेनाक अध्यक्ष आ किसान सुरजीत सिंह यादव द्वारा दायर याचिकामे कहल गेल अछि जे तिरुमाला तिरुपति देवस्थानम (टीटीडी) श्री वेंकटेश्वर स्वामी मन्दिरमे भक्तसभकेँ घीवक बदला पशुक वसासँ बनाओल गेल “लड्डू प्रसादम” परोसि कऽ हिन्दू धर्मक उपहास कयलक अछि आ हिन्दूसभक भावनाकेँ आहत कयलक अछि।
याचिकामे कहल गेल अछि जे श्री वेंकटेश्वर स्वामी मन्दिरमे “लड्डू प्रसादम” तैयार करबामे जानवरक वसाक उपयोगक आरोपसँ हिन्दू समुदायक अंतरात्मा झकझोरि देलक अछि आ ओकर सदस्यसभक धार्मिक भावनाकेँ ठेस पहुँचल अछि। टीटीडी आन्ध्र प्रदेशक तिरुपतिमे श्री वेंकटेश्वर मन्दिरक आधिकारिक संरक्षक अछि।
याचिकामे कहल गेल अछि कि “ई याचिका आम जनताक लाभक लेल दायर कयल गेल अछि, जे वित्तीय आ कानूनी रूपसँ पूर्ण रुपसँ /उचित रुपसँ सुसज्जित नहिं हेबाक कारण स्वयं न्यायालयक दरवाजा खटखटयबामे असमर्थ भऽ सकैत छथि आ तेँ ओ ‘पीआईएल’क सहारा लेबाक स्थितिमे नहि छथि।”
आंध्र प्रदेशक मुख्यमंत्री एन चन्द्रबाबू नायडूक एहि दावापर एकटा पैघ राजनीतिक विवाद उत्पन्न भऽ गेल अछि जे दक्षिणी राज्यमे पूर्ववर्ती वाईएस जगन मोहन रेड्डीक नेतृत्ववला सरकारक समयमे तिरुपति लड्डू तैयार करबामे जानवरक वसाक उपयोग कयल गेल छल।
वाईएसआरसीपी नायडू पर राजनीतिक लाभक लेल “घृणित आरोप” लगयबाक आरोप लगओलक अछि, जखनि कि राज्यमे सत्तारूढ़ तेलुगु देशम पार्टी (टीडीपी) अपन दावाक समर्थन लेल एकटा प्रयोगशाला रिपोर्ट प्रसारित कयलक अछि।
