बिहारक राजधानी पटनामे दू दिवसीय यात्रा आ पर्यटन मेला चलि रहल अछि। एहिमे देशक सभ राज्यक रंग देखल जा रहल अछि। उत्तर प्रदेश, उत्तराखंड, महाराष्ट्र, राजस्थान, पंजाब, दिल्ली, तेलंगाना, ओडिशा, छत्तीसगढ़, गोवा, असम, मेघालय, त्रिपुरा आ केरलक पर्यटन विभागक प्रतिनिधि सेहो भाग लऽ रहल छथि। मुख्यमंत्री नीतीश कुमार पर्यटन मेला २०२४ केर उद्घाटन करैत सबकेँ बधाई देलनि।
मुख्यमंत्री नीतीश कुमार मंगल दिन सम्राट अशोक कन्वेंशन सेंटर स्थित ज्ञान भवनमे फीता काटि पर्यटन विभाग द्वारा आयोजित ट्रेवल एंड टूरिज्म फेयर-२०२४ केर उद्घाटन कयलनि। उद्घाटनक बाद मुख्यमंत्री यात्रा आ पर्यटन मेलामे लागल विभिन्न प्रदर्शनीक निरीक्षण कयलनि। संबंधित उत्पाद/सेवाक संबंधमे विस्तृत जानकारी लेलनि। पर्यटन मंत्री नीतीश मिश्र मुख्यमंत्रीकेँ लोगो आ अंगवस्त्र भेंट कए स्वागत कयलथि।
एहि दू दिवसीय ट्रैवल एंड टूरिज्म फेयर पटना २०२४ मे बिहारक सङ्ग भारत सरकारक पर्यटन मंत्रालय, उत्तर प्रदेश, महाराष्ट्र, राजस्थान, पंजाब, दिल्ली, तेलंगाना, ओडिशा, छत्तीसगढ़, उत्तराखंड, गोवा, असम, मेघालय, त्रिपुरा, केरल राज्य पर्यटन विभागक प्रतिनिधि सेहो भाग लऽ रहल छथि। एकर अतिरिक्त पड़ोसी देश नेपाल आ भूटानक टूर ऑपरेटर सेहो एहि आयोजनमे भाग लऽ रहल छथि।
एहि आयोजनमे भाग लेनिहार सभ प्रतिनिधि पटना आबि बिहारक पर्यटन स्थलक जानकारी लेताह आ फेर अपन देश आ राज्यमे एकर प्रचार-प्रसार करताह। टीटीएफ, पटनाक दौरान पर्यटन उद्योगसँ जुड़ल व्यवसायी आ संस्थानक लेल पर्यटन केन्द्रक दौरा, सांस्कृतिक कार्यक्रम, निवेशक शिखर सम्मेलन, कार्यशाला आदिक आयोजन सेहो कयल जायत। एहि दौरान देश-विदेशक प्रतिनिधि केर बिहारक पारंपरिक-धार्मिक केर संग नव इको-टूरिज्म सेंटरक बारेमे विस्तारसँ जानकारी देल जायत।
एहि अवसर पर केन्द्रीय संस्कृति आ पर्यटन मंत्री गजेन्द्र सिंह शेखावत, उत्तराखण्डक पर्यटन, सांस्कृतिक आ सिंचाई मंत्री सतपाल महाराज, जल संसाधन आ संसदीय कार्य मंत्री विजय कुमार चौधरी, पर्यटन मंत्री नीतीश मिश्रा, पर्यटन विभागक सचिव लोकेश कुमार सिंह, मुख्यमंत्रीक सचिव कुमार रवि, मुख्यमंत्रीक विशेष कर्तव्य अधिकारी गोपाल सिंह, पटनाक जिलाधिकारी डॉ. चन्द्रशेखर सिंह सेहो उपस्थित छलाह। वरिष्ठ पुलिस अधीक्षक राजीव मिश्रा सहित अन्य वरिष्ठ अधिकारी आ पर्यटनसँ जुड़ल संगठन आ कंपनीक प्रतिनिधि उपस्थित छलाह।
