जिलाक मसौढ़ीमे सत्ताक संघर्ष खूनी संघर्षमे बदलि गेल। शनिकेँ साँझ जलाल बीघा गाममे दूटा समूहक बीच विवाद हिंसामे बदलि गेल। दुनू दिसिसँ भारी पथराव आ गोलीबारी भेल।
प्रत्यक्षदर्शीक अनुसार, लगभग ५० राउंड गोली चलाओल गेल, जाहिसँ गाममे अराजकता पसरि गेल। एहिमे एकटा ७ वर्षक निर्दोष बच्चा गोलीक शिकार भऽ गेल। घायल बच्चाकेँ रिश्तेदार लोकनि रेफरल अस्पताल लऽ गेलाह, मुदा गम्भीर स्थितिक कारण चिकित्सक ओकरा पटना मेडिकल कॉलेज अस्पताल (पीएमसीएच) रेफर कऽ देलनि। मुदा नहिं बांचल।
गोलीबारीक एहि घटनाक बाद गाममे दहशतक माहौल बनि गेल अछि आ लोक अपन घरमे नुकाबय लेल विवश भऽ गेल अछि।
घटनाक सूचना भेटैत मसौढ़ी थाना प्रभारी आ एसडीपीओ एकटा टीमक संग घटनास्थल पर पहुँचलाह। पूरा क्षेत्रमे पुलिस तलाशी अभियान चलाओल गेल। समाचार लिखय तक एहि मामिलामे प्रमोद कुमार, विकास कुमार, सियाराम, आ पप्पूकेँ गिरफ्तार कयल जा चुकल छल।
मसौढ़ी पुलिसक अनुसार, सुधीर यादव आ नगीना यादवक बीच वर्चस्वकेँ लऽ कऽ बहुत दिनसँ तनाव चलि रहल अछि। पुलिस जाँचमे इहो पता चलल अछि जे दुनू समूहक बीच पहिने कतेको झड़प भऽ चुकल अछि, मुदा एहि बेर स्थिति एतेक बढ़ि गेल जे खुलि कऽ गोली चलाओल गेल।
गोलीबारी आ हिंसाक बाद गाममे तनावक स्थिति बनल अछि। पुलिस पूरा क्षेत्रकेँ छावनीमे बदलि देलक अछि आ आबय-जायवला सभ गोटे पर नजरि राखि रहल अछि। मसौढ़ीक एसडीपीओ नव वैभव कहलनि जे पुलिस कोनो अप्रिय घटना फेरसँ होयबासँ रोकबाक लेल लगातार गश्त लगा रहल अछि। मुदा, घटनास्थलसँ कोनो खोखा वा बुलेट नहि भेटल अछि।
मामिलाक गम्भीरताकेँ देखैत पुलिस सभ पहलूक जाँच कऽ रहल अछि। आब ई देखबाक अछि जे की प्रशासन जल्दिये एहि हिंसक झड़पक वास्तविक कारणकेँ सोझाँ आनि दोषीसभकेँ न्यायक कठघरामे आनि सकैत अछि कि नहि। एखन धरि गाममे सन्नाटा पसरल अछि आ लोकसभ कानून-व्यवस्थाक चिन्ता करैत छथि।
