पटना पुलिस आ अपराधीक बीच मुठभेड़, ४टा गिरफ्तार

पटना समदिया
*

कंकड़बाग थाना क्षेत्रक अशोक नगरक राम लखन पथ क्षेत्रमे मंगलदिन दुपहरमे तखन दहशत पसरि गेल जखन चारिटा उपद्रवी एकटा घरमे घुसि गेल। तहन राम लखन सिंह पथ पर स्थित उपेन्द्र सिंह’क घरमे चारिटा बदमाशक उपस्थितिक सूचना पुलिसकेँ देल गेल। सूचना भेटलाक बाद पुलिस तुरन्त घटनास्थल पर पहुँचल आ पूरा क्षेत्रकेँ घेरि लेलक।

एहि अपराधीसभकेँ पकड़बाक लेल पटनाक एसएसपी अवकाश कुमार चारिटा थानाक एसटीएफ’क जवान, ब्लैक कमांडो आ पुलिससँ पूरा क्षेत्रकेँ घेरि लेलनि। पुलिस अपराधीसभकेँ आत्मसमर्पण करबाक लेल कहलक, मुदा अपराधी सभ गोली चला देलक। अपराधी सभ कुल चारि राउंड फायरिंग केलक। एहि दौरान ब्लैक कमांडोकेँ बजायल गेल। ब्लैक कमांडो उपेन्द्र सिंहक घरमे घुसि चारिटा अपराधीकेँ हिरासतमे लऽ लेलक। पटना पुलिसक ई अभियान कुल दू घंटा धरि चलल।

एहि अभियानमे चारिटा थानाक पुलिस तैनात कयल गेल छल। जनतबक अनुसार जहिना पुलिसकेँ घरमे अपराधी लोकनिक छुपबाक समाचार भेटल, पुलिस सभ दिससँ उपेन्द्र सिंहक घरकेँ घेरि लेलक। एहि क्षेत्रमे चारिटा थानाक पुलिस बल तैनात कयल गेल छल जाहिसँ ई सुनिश्चित कयल जा सकय जे अपराधी भागि नहि सकय। पुलिस अपराधी सभकेँ आत्मसमर्पण करबाक लेल कहलक। क्षेत्रमे पुलिसक गतिविधि देखि लोकक पैघ भीड़ जमा भऽ गेल। कोनो अप्रिय घटनाकेँ रोकबाक लेल पुलिस लोकसभकेँ ओहि क्षेत्रसँ हटा देलक।

चारि अपराधी पकड़लाक बाद पटनाक एसएसपी पूरा अभियानक विवरण दैत कहलनि जे चारिटा अपराधीकेँ हिरासतमे लेल गेल अछि। पूछताछ जारी अछि। सीसीटीवी फुटेज सेहो जाँचल जा रहल अछि। घटनास्थल पर एखन स्थिति सामान्य अछि। अपराधी सभ चारि राउंड फायरिंग केलक। पुलिसक तरफसँ कोनो गोलीबारी नहि भेल।

पुलिस पूरा घरक गहन तलाशी लेलक। पटनाक एसएसपी कहलनि जे ई भूमि विवादक मामिला अछि। एहि भवनक जांच कएल गेल अछि। आब कियो अपराधी भीतर नहि नुकायल अछि। जमीन विवादक कारण अपराधी घरमे घुसि गेल छल। किछु अपराधी सेहो भागबामे सफल भेल अछि। ओकर खोज सेहो कएल जा रहल अछि। अभियान समाप्त भेलाक बाद पुलिस चारो अपराधीकेँ एक-एक कऽ जीपमे लऽ गेल। घटनास्थल पर पैघ भीड़ जमा भऽ गेल।

मुदा, एखन धरि ई स्पष्ट नहि अछि जे जमीनक विवाद केकर बीच अछि। पुलिस उपेन्द्र सिंहसँ सेहो पूछताछ कऽ सकैत अछि, किएक तँ अपराधी लोकनि हुनकर घरमे नुकायल छल। एहि बातक जाँच कयल जा रहल अछि जे अपराधीसभ उपेन्द्र सिंहक संग जमीनक विवाद छल वा कोनो तेसर व्यक्ति अछि जे अपराधीसभकेँ उपेन्द्र सिंहक घर पठौलक।