पाकिस्तानक रक्षा मंत्री ख्वाजा आसिफ स्वीकार कयलनि जे हुनकर देश आतंकवादकेँ समर्थन कय रहल अछि। एकटा इंटरव्यूक वायरल क्लिपमे हुनका कहैत सुनल जा सकैत अछि जे पाकिस्तान पश्चिमक लेल तीन दशकसँ सबसँ ‘गंदा काज’ करैत आयल अछि। मीडिया रिपोर्टक अनुसार आसिफ ई चौंकायबाला बयान स्काई न्यूज संग एकटा इंटरव्यूक दौरान देलनि। आतंकवादी सभ मंगल दिन जम्मू-कश्मीरमे एकटा प्रसिद्ध पर्यटन स्थल – पहलगाम स्थित बैसरन घाटीमे लोक (ज्यादातर पर्यटक) पर अंधाधुंध गोली चलौलक। हमलामे 28 लोकक मृत्यु भऽ गेल आ कतेको आओर घायल भऽ गेल। एहि हमलाक बाद भारत-पाक’क बीच तनाव चरम पर पहुँच गेल अछि।
वायरल वीडियो क्लिपमे पाकिस्तानक रक्षा मंत्री स्काई न्यूजक याल्डा हकीमक संग बातचीत करते देखल जा रहल छथि। याल्डा पुछैत छथि, “अपने लेकिन मानैत छी महोदय, जे पाकिस्तानकेँ एहि आतंकवादी संगठन सभक समर्थन, ट्रेनिंग आ फंडिंगक एकटा लंबा इतिहास रहल अछि ?” ख्वाजा आसिफ अपन जवाबमे कहलनि, “हम लगभग तीन दशकसँ अमेरिका आ ब्रिटेन सहित पश्चिमी देश सभक लेल ई गंदा काज कय रहल छी। ई एकटा गलती छल आ हमरा एकर कीमत चुकबय पड़ल, एहि कारण अहाँ हमारासँ ई कहि रहल छी। जंँ हम सोवियत संघक खिलाफ युद्ध आ 9/11 केर बादक जंगमे शामिल नहि होइतौंह, तँ पाकिस्तानक ट्रैक रिकॉर्ड बेदाग रहित।”
इंटरव्यूमे आसिफ पहलगाम हमलाक बाद पाकिस्तानक खिलाफ सुरक्षा उपाय लागू करबाक लेल नई दिल्लीकेँ आलोचना कयलनि। 22 अप्रैलकेँ क्रूर आतंकी हमलाक बाद भारत पाकिस्तानकेँ खिलाफ कतेको कूटनीतिक कदम उठओलक अछि। भारत पाकिस्तान संग 1960 केर सिंधु जल समझौता केर तत्क्षण प्रभावसँ निलंबित करब, अटारी इंटिग्रेटेड चेक पोस्ट बंद करब, पाकिस्तानी नागरिक सभक लेल वीजा सेवाके तत्क्षण प्रभावसँ निलंबित करब आ अन्य कदम उठौलक अछि।
