अंतर्राष्ट्रीय मुद्रा कोष (आईएमएफ) गरीबीसँ जूझि रहल पाकिस्तानकेँ पैघ झटका देलक अछि। पाकिस्तानक प्रधानमन्त्री शहबाज शरीफ नव ऋणक लेल लगातार आईएमएफक दरवाजा पर फोन कऽ रहल छलाह, मुदा आईएमएफ हुनकर आशाकेँ धराशायी कऽ देलक अछि। आईएमएफ कहलक जे पाकिस्तानक सङ्ग चलि रहल वार्ताक बाद ओकरा कोनो नव ऋण भेटत कि नहिं ई कहब जल्दबाजी होयत। पाकिस्तानी मीडिया आउटलेट डॉन एहि बारेमे जानकारी देलक अछि। वाशिंगटनमे आईएमएफक संचार निदेशक जूली कोजैक पुष्टि कयलनि जे आईएमएफक प्रतिनिधिमण्डल एखन इस्लामाबादमे अछि आ पाकिस्तानी अधिकारीसभक सङ्ग वार्ता कऽ रहल अछि। जूलीसँ पूछल गेल छल जे की एहि वार्तालापसँ ऋण पर कर्मचारी स्तरक समझौता भऽ सकैत अछि या ई मात्र एकटा प्रारंभिक बैसार छल। जूली कहलनि “जतय धरि पाकिस्तानक सवाल अछि, एखन ओतय हमर एकटा मिशन अछि। हम ताबत धरि प्रतीक्षा करब जा धरि ओ काज पूरा नहिं कऽ लेत आ मिशनक निष्कर्ष समय अयला पर अहाँकेँ बता देब।”
इस्लामाबादक सङ्ग वार्ताक विषयमे एकटा नव अपडेट दैत कहलनि जे २९ अप्रैलकेँ आईएमएफ कार्यकारी बोर्ड पाकिस्तानक लेल स्टैंड-बाय व्यवस्थाक दोसर समीक्षा पूरा कयलक, जाहिसँ लगभग १.१ अरब डॉलरक वितरण सम्भव भेल। ओ कहलनि, “बोर्ड द्वारा स्टैंड-बाय व्यवस्थाक दोसर आ अंतिम समीक्षाक पूरा होयब अधिकारीसभक मजबूत नीतिगत प्रयासकेँ प्रतिबिम्बित करैत अछि, जाहिसँ अर्थव्यवस्थाकेँ स्थिर करबामे सहायता भेटल।”
पाकिस्तान पछिला गर्मीमे दिवालियापनसँ बचल छल जखन आईएमएफ ३ अरब डॉलरक स्टैंड-बाय व्यवस्थाकेँ मंजूरी देलक। ऋणक दोसर आ अंतिम किस्त पछिले महीना स्वीकृत भेल छल। दोसर किश्तक मंजूरीक तुरंत बाद पाकिस्तान एक बेर फिर आईएमएफ केर सामने हाथ पसारि देने छल। वर्तमानमे आईएमएफ केर अधिकारी पाकिस्तानक संग कर्ज पर बातचीत कऽ रहल छथि।
