पाकिस्तान चीनक सहयोगसँ अपन शस्त्रागारक कऽ रहल आधुनिकीकरण : अमेरिकी रक्षा खुफिया एजेंसी

नई दिल्ली
*

पहलगाम आक्रमणक बाद भारतक ऑपरेशन सिंदूरसँ पाकिस्तान एखन धरि डरमे अछि। ओकरा अपन स्थितिक अंदाज भऽ गेल अछि, एहि लेल ओ चीनक मददिसँ अपन परमाणु शस्त्रागारकेँ विकसित कऽ रहल अछि। ई दावा अमेरिका अपन एकटा रिपोर्टमे कएलक अछि।

अमेरिकी रक्षा खुफिया एजेंसी द्वारा रविकेँ जारी ‘विश्व खतरा आकलन रिपोर्ट 2025’ मे पाकिस्तानकेँ लऽ कऽ कतेको दावा कएल गेल अछि। एहिमे कहल गेल अछि जे पाकिस्तान चीनसँ सैन्य आ आर्थिक सहायतासँ अपन परमाणु शस्त्रागारक आधुनिकीकरण कऽ रहल अछि। एहिमे ईहो कहल गेल अछि जे ओ भारतकेँ अपन अस्तित्व लेल खतरा मानैत अछि।

‘विश्व खतरा आकलन रिपोर्ट 2025’ मे पाकिस्तानक सेना ओकर सैन्य अभियान आ परमाणु हथियारक बारेमे विस्तारसँ जानकारी देल गेल अछि। एहिमे दाबी कयल गेल अछि जे आबि रहल वर्षमे पाकिस्तानक शीर्ष प्राथमिकता सैन्य ढाँचाक विकास आर मजबूत करय केर संग क्षेत्रीय पड़ोसीसँ सीमा पार होबयबला झड़प आ अपन परमाणु शस्त्रागारक निरंतर आधुनिकीकरण शामिल रहत।

अमेरिकी रिपोर्टमे कहल गेल अछि जे पाकिस्तान भारतकेँ अपन अस्तित्वक लेल सर्वोत्तम खतरा मानैत अछि। एहेनमे ओ भारतक सैनिक ताकतक मुकाबला करबाक लेल अपन आ अपन सेनाक विकास कय रहल अछि। ओ अपन परमाणु हथियार सभक सुरक्षा आ कमान प्रणालीकेँ विकास आ आधुनिक प्रौद्योगिकीसँ लैस सेहो कय रहल अछि। एकरा लेल ओ विदेशी आपूर्तिकर्ता सभ आ बिचौलिया सभसँ सामूहिक विनाशक हथियार (वेपन्स ऑफ़ मास डिस्ट्रक्शन)सँ जुड़ल सामान किनि रहल अछि। एहिमे चीन ओकर सर्वोत्तम मददगार अछि।

रिपोर्टक अनुसार, पाकिस्तान चीनसँ सामूहिक विनाशक हथियार (डब्लयू एम डी) विकसित करबाक लेल सामग्री आ प्रौद्योगिकी प्राप्त कय रहल अछि। एहिमेसँ अधिकांश सामग्री हांगकांग, सिंगापुर, तुर्किये आ संयुक्त अरब अमीरात जेहेन देशक जरिए भऽ रहल अछि।

पहलगाम आतंकी हमलामे 26 लोकक मृत्युक बाद भारत ऑपरेशन सिंदूरकेँ अंजाम देलक। एहि ऑपरेशनमे भारत 7 मईकेँ पाकिस्तान आ पीओकेमे कतेको आतंकी ठिकान पर सटीक हवाई हमला कयलक। एकर उत्तरमे पाकिस्तान 8, 9 आ 10 मईकेँ भारतीय सैन्य ठिकान पर हमलाक कोशिश कयलक, जकरा भारत विफल कय देलक। पाकिस्तानकेँ सबसँ पैघ झटका 10 मईकेँ भोरमे लागल, जखनि भारतीय वायुसेना पाकिस्तानक सैन्य ठिकान पर हवाई हमला कयलक, जाहिमे हवाई अड्डा, रडार इकाइ आ गोला-बारूदक भंडार शामिल छल। एहि सैन्य कार्यवाहीमे पाकिस्तानक सरगोधामे स्थित एयरबेस सेहो शामिल छल। रिपोर्टमे दावा कएल जा रहल अछि जे किराना हिल्स पर पाकिस्तान अपन परमाणु हथियार नुका कए रखने अछि आ एहि हमलामे पाकिस्तानमे न्यूक्लियर लीक भेल।

एहि अटकल सभक बीच भले ही अंतर्राष्ट्रीय परमाणु ऊर्जा एजेंसी अर्थात् आईएईए एहि बातकेँ खारिज कय देलक जे पाकिस्तानमे किछु न्यूक्लियर लीक भऽ रहल अछि, मुदा भारतक हमलासँ पाकिस्तानक नींद उड़ि गेल अछि आ ओ अपनाकेँ मजबूत करबाक लेल डेग उठा रहल अछि।