पटोरी नगर परिषद क्षेत्र अन्तर्गत पुरानी बाजार आ इमनसराय आ मोहनपुर प्रखंड क्षेत्रसँ गुजरैय वला एनएच-122बी केर जर्जर हालत आ जलजमावक समस्याक खिलाफ ग्रामीण सब अनोखा विरोध दर्ज करौलनि। रविदिन पुरानी बाजार जामा मस्जिद केर समीप सड़क पर भरल पानिमे ग्रामीण सांकेतिक रूपसँ धान रोपलाह।
एहि विरोध प्रदर्शनक दौरान लोजपा नेता अभय कुमार कहला जे विकासक पूरा जिम्मेदारी नगर परिषद पर छोड़ब की उचित अछि ? की सड़क निर्माण, मरम्मत आ नवीकरणक जिम्मेदारी विधायकक नहि अछि ? ओ प्रश्नवाचक स्वरमे स्थानीय जनप्रतिनिधि केर निष्क्रियता केर निशाना बनेलथि।
युवा समाजसेवी गौरव किशोर उर्फ लकी केर संयोजनमे आयोजित एहि आन्दोलनमे वार्ड पार्षद उज्जवल कुमार कहलनि जे ई सड़क वर्षोंसँ खराब हालतमे अछि आ एकरा अनाथ सड़क कहल जा सकैत अछि। ओ कहला जे एहि सड़कसँ रोज हजारों राहगीर आ अधिकारी गुजरैत छथि, मुदा एखन धरि केवल आश्वासन भेटल अछि।
पूर्व जिला पार्षद संजय राम कहलनि जे, एहि सड़क आ जलजमावक समस्याकेँ लs कs कतेको बेर अधिकारीकेँ शिकायत भेल, मुदा कोनो ठोस कारवाई नहि भेल।
संगहि ईमनसराय पंचायतक मुखिया मोहम्मद कमरुल अंसारी स्थानीय विधायकसँ इस्तीफाक मांग कयलथि। विरोध प्रदर्शनमे शामिल स्थानीय लोकक कहब अछि जे जलजमावक स्थिति एतेक गंभीर भs गेल अछि जे पुरानी बाजारक जामा मस्जिदमे दुर्गन्धक कारण बहुतो नमाज पढ़ब बंद कs देलक अछि। एहि दौरान आन्दोलनक संयोजक गौरव किशोर (लकी) चेतावनी देलनि जे जँ एक मासक भीतर सड़कक मरम्मत नहि आ जलजमावसँ राहत नहि भेटत तँ चरणबद्ध आन्दोलन कएल जाएत ।
लोजपा जिला सचिव विकास कुमार, प्रखंड अध्यक्ष सुरेश पासवान, नगर महिला प्रकोष्ठ अध्यक्ष रेणु देवी, ग्रामीण राजीव कुमार उर्फ नान्हे जी, मो. शदाब आलम, मो. कलाम, मो. अंजार, जामा मस्जिदकेँ सदरे आलम मो. मुमताज अहमद बबलू, डॉ. शमीम, मो. साहिल, मो. तहसीन, मो. अखलाक अहमद, डॉ. हबीब, व्यापारी अमोद ठाकुर सहित दर्जनों ग्रामीण एहि आंदोलनमे भाग लेलनि।
