बिहार विधानसभामे बृहस्पति दिन हंगामा भेल जखन विपक्षी सदस्य मुख्यमंत्री नीतीश कुमारक नेतृत्व वाला सत्तारूढ़ सरकार पर अविश्वास व्यक्त करैत सदनक बीचोबीच समानांतर “कार्यवाही” करय केर कोशिश कयलथि। एक दिन पहिने, विपक्षी महिला विधायक सदनक भीतर मुख्यमंत्रीक “अपमानजनक” व्यवहार आ राष्ट्रीय जनतांत्रिक गठबंधन (एनडीए) सरकारक कथित विफलताकेँ उजागर करबाक लेल विधानसभा दिस कूच कयनिहार कांग्रेस कार्यकर्ता पर लाठीचार्ज करबाक विरोधमे कारी पट्टी पहिरने छलीह।
विपक्षी सदस्यक हंगामाक बीच विधानसभा अध्यक्ष नन्द किशोर यादव प्रश्नकाल चलयबाक निर्णय लेलनि आ कर्मचारीक लेल राखल फर्नीचर पलटबाक प्रयास करयवला विपक्षी सदस्यसभकेँ चेतौनी दैत कहलनि, “ई सभ विधानसभाक कर्मचारी छथि। जँ अहाँक कृत्यक कारण कियो घायल होइत अछि तँ हम कठोर कारवाई करबाक लेल विवश होयब। बीचोबीच बैसल विपक्षी सदस्य भाकपा (माले) विधायक दलक नेता महबूब आलमकेँ कुर्सी पर बैसा आ हुनका सदनक “अध्यक्ष” कहि समानान्तर “कार्यवाही” करबाक असफल प्रयास कयलनि।
विपक्षी विधायक प्रश्नकालक अन्त धरि सदनक बीचोबीच डटल रहलाह मुदा बादमे आरोप लगओलनि जे हुनकर आवाज नहिं सुनल जा रहल अछि आ ओ बाहर चलि गेलाह। विपक्षी दलक सदस्य द्वारा पेश कयल गेल कतेको स्थगन प्रस्तावपर कटाक्ष करैत अध्यक्ष कहलनि जे “ई विचित्र बात अछि कि जे सभ ई प्रस्ताव प्रस्तुत कयलनि ओ सदनमे उपस्थित होयबाक तकलीफ तक नहिं उठेलनि।
विपक्षी सदस्यक अनुपस्थितिक बीच शून्यकाल आयोजित कयलाक बाद अध्यक्ष सदनकेँ दुपहरक भोजन लेल स्थगित कऽ देलनि। एम्हर राज्य विधानमण्डलक उच्च सदनमे विपक्षी सदस्य लोकनि द्वारा महिला विधायकक प्रति मुख्यमंत्रीक व्यवहारक मुद्दा उठाओल गेल, जाहिसँ सभापति अवधेश कुमार सिंहकेँ आजुक कार्यवाही शुरू भेलाक किछु मिनट बाद बिहार विधान परिषदकेँ स्थगित करय पड़लनि।
