चुनावी बॉन्ड केर विपक्ष कहलक बड़का घोटाला, एसआईटी जांचक मांग
नई दिल्ली
*
राज्यसभा सांसद कपिल सिब्बल शुक्रदिन चुनावी बॉन्ड योजनाकेँ “पैघ घोटाला” बतौलनि आ कहलनि जे एहि मामिलाक जाँचक लेल अदालत द्वारा नियुक्त अधिकारीसभक एकटा विशेष जाँच दल (एसआईटी)क गठन कयल जाय।
एकटा संवाददाता सम्मेलनकेँ सम्बोधित करैत चुनावी बॉन्डक विरुद्ध सर्वोच्च न्यायालयक मामिलामे याचिकाकर्तासभक तरफसँ उपस्थित वरिष्ठ अधिवक्ता सिब्बल इहो आरोप लगओलनि जे ई योजना “अवैध” अछि आ एकर उद्देश्य एकटा राजनीतिक दलकेँ एहि तरहेँ समृद्ध करब अछि जे कोनो अन्य राजनीतिक दल एकरा सङ्ग प्रतिस्पर्धा नहिं कऽ सकय। हुनकर टिप्पणी चुनाव आयोग द्वारा चुनावी बॉन्डक आंकड़ा सार्वजनिक करबाक एक दिन बाद आयल अछि।
“ई योजना पूर्व वित्त मंत्री (अरुण जेटली) द्वारा शुरू कयल गेल छल आ ओ सोचलनि जे एहि तरहें कोनो राजनीतिक दल हमरासँ (भाजपा) प्रतिस्पर्धा नहिं कऽ सकत। ओ सही साबित भेलाह। चुनावी प्रतिस्पर्धामे मात्र ओ रहि सकैत छथि जिनका लग पैसा अछि।”
राज्यसभा सदस्य कहलनि जे एहि बातक जाँच होयबाक चाही जे कोन राजनीतिक दलकेँ कतेक चंदा भेटल। ओ कहलनि “सवाल इ अछि जे बॉन्ड केकरा लग गेल ? बॉन्ड संख्याक पता लगायल जा सकैत अछि, ई जाञ्चक विषय अछि।”
ओ कहलनि जे एहि मामिलाक जाँचक लेल एकटा एसआईटीक गठन कयल जाय आ एहिमे अदालत द्वारा नियुक्त स्वतंत्र अधिकारी शामिल होयबाक चाही।
कांग्रेस महासचिव जयराम रमेश शुक्रदिन चुनावी बॉन्ड योजनाकेँ “स्वतंत्र भारतक सबसँ पैघ घोटाला” बतौलनि आ कहलनि जे चुनाव आयोग (ईसी) द्वारा एहि पर साझा कयल गेल आंकड़ा “अधूरा” अछि।
ओ इहो कहलनि कि कांग्रेस इलेक्ट्रॉनिक वोटिंग मशीन (ईवीएम) शुरू करय केर खिलाफ नहिं छल, बल्कि चुनाव प्रक्रियामे ‘वोटर वेरिफिएबल पेपर ऑडिट ट्रेल’ (वीवीपीएटी) केर उपयोग चाहैत छल जाहिसँ मतदाताकेँ पता चलय कि हुनकर वोट सही ढंगसँ देल गेल अछि।
महाराष्ट्रक पालघर जिलाक वाडामे एकटा संवाददाता सम्मेलनकेँ सम्बोधित करैत रमेश कहलनि जे हुनकर पार्टी पछिला सालसँ चुनाव आयोगसँ समय मांग रहल अछि, मुदा एखन धरि मुख्य निर्वाचन आयुक्त (सीईसी) हुनका भेंट करय केर समय नहिं देलक अछि। पूर्व केंद्रीय मंत्री पूछलनि, “आखिर चुनाव आयोग विपक्षी दलसँ भेंट करयसँ किएक आ केकरासँ डरैत अछि ?”
निर्वाचन आयोगक वेबसाइट पर प्रकाशित चुनावी बॉन्ड आंकड़ाक उल्लेख करैत रमेश कहलनि जे विवरण अपूर्ण अछि।
ओ कहलनि “ई स्वतंत्र भारतक सबसँ पैघ घोटाला अछि। हमरा लग सुप्रीम कोर्ट जेबाक विकल्प अछि। हम जनताक अदालतमे जाएब।”
पूर्व मुख्यमंत्री अशोक गहलोत शुक्रदिन एक बेर फेर चुनावी बॉन्ड पर केंद्रमे सत्तारूढ़ भारतीय जनता पार्टी पर निशाना साधैत कहलनि कि आंकड़ा सामने आबय केर कारण ओकर लूट देशक सामने आबि गेल अछि। ओ कहलनि जे भाजपा सट्टेबाजी, जुआ आदिसँ जुड़ल कम्पनीसभसँ चंदा लेलक अछि आ ई भाजपाक चरित्रक सत्यापन अछि।
गहलोतक ई टिप्पणी चुनाव आयोग द्वारा चुनावी बॉन्ड केर आंकड़ा सार्वजनिक करय केर एक दिन बाद आयल अछि। सोशल मीडिया प्लेटफॉर्म ‘एक्स’ पर जारी बयानमे गहलोत कहलनि, “चुनावी बॉन्डक डाटा सार्वजनिक भेलाक बाद भारतीय जनता पार्टी द्वारा कयल गेल लूट देशक सामने आबि गेल अछि।” ओ लिखलनि “चुनावी बॉन्डक जानकारीसँ तऽ इ बुझाइत अछि जे ईडी भाजपाक वसूली विभाग बनि गेल अछि। केन्द्रीय एजेंसीसभ द्वारा छापा मारल गेल कम्पनीसभ भाजपाकेँ चुनावी बॉन्डक रुपमे चंदा देलक आ हुनकासभक विरुद्ध कार्यवाही रुकि गेल।”
